Kongreya Azadiya Îranê bi daxuyaniyeke nivîskî ragihand ku binpêkirinên sîstematîk, parçeyek ji polîtîkaya Komara Îslamî ne ku ji bo tundkirina atmosfera tirs û xofê û ferzkirina desthilatdariya xwe bi rêya tundûtûjiyê li Kurdistan û seranserî Îranê bikar tîne.
Kongreya Azadiya Îranê, derbarê pêla nû ya êrişên leşkerî yên li ser partiyên Kurdistanî û zêdebûna zext û zordariya li navxweyî ya welat de daxuyaniyeke nivîskî belav kir.
Daxuyanî wiha ye: “Em êrişên li ser partiyên Kurdî û kiryarên bêdengkirinê yên li Îranê şermezar dikin!
Komara Îslamî wekî kevneşopî û xeta xwe ya dîrokî, di heman demê de ku li gel hêzên derve danûstandinan dike û peymanan îmze dike, li navxweyî ya welat jî kiryarên bêdengkirinê, bidarvekirin, kuştin û komkujiyan zêdetir dike.
Li Kurdistanê, careke din dibin sîbera pêleke berfireh a bêdengkirin û kuştinê de, êrişên muşekî û dironî yên Supaya Pasdaran a Komara Îslamî ya Îranê ên ser kamp û baregehên partiyên Kurdistanî (ji wan jî Partiya Azadiyê û Partiya Demokrat a Kurdistana Îranê) berdewam dikin. Ev êriş di demekê de ne ku nêzî 39 rojin agirbest hatiye ragihandin û peyman hatine îmzekirin. Ev binpêkirinên sîstematîk, parçeyek ji polîtîkaya Komara Îslamî ne ku ji bo tundkirina atmosfera tirs û xofê û ferzkirina desthilatdariya xwe bi rêya tundûtûjiyê li Kurdistan û seranserî Îranê bikar tîne.
Her wiha, ajansa nûçeyan a hikûmetê bi belavkirina lîsteyekê ku tê de navên çalakvanên siyasî hene, daxwaz ji polîsê navneteweyî (Interpol) kiriye ji bo girtina van kesan daku wan radestî hikûmeta xwînrij a Îranê bikin.
Ev di demekê de ye ku li gorî nêrîna Kongreya Azadiya Îranê û piraniya xelkê Îranê, divê ev berpirsên rejîma gendel û xwînrij a Komara Îslamî li pêşberî dadgeheke serbixwe, dadperwer de bên darizandin. Ew kesên ku li navxwe û derveyî welat ji bo azadî û dadperweriyê têkoşînê dikin, ti carî radestî vê zilmê nabin, mantiqa gelê Îranê ew nîne ku tenê rêberên Komara Îslamî biguherîne, belku armanc hilweşandina rasteqîn a vî mîratî û sîstemê ye.
Heman ew desthilatdariya ku ji ber tirs û bêhêvîtiyeke kûr dilerize, ji bo tolhildana ji gelê Îranê, dest bi girtina bi kom a çalakvanên siyasî, sivîl, sendîka, mafên mirovan û rojnamevanan kiriye. Rejîm di bin sîbera şerê wêranker de, cezayên bidarvekirinê hîn zêdetir ji carên borî bi cih tîne.
Atmosfera siyasî ya navxweyî tewra ji bo mamosteyên zanîngehê jî hatiye tengkirin û rê li ber rûniştinên akademîk tê girtin. Her wiha bi bikaranîna dîplomasiya veşartî ya li Hewlêrê, gef li wan rojnamevan û çalakvanên siyasî û sivîl tê xwarin ku li derveyî welatin. Rejîm bi rêya zêdekirina zextê ya li ser malbatên wan ên li navxwe û di hinek rewşan de jî bi astengkirina kombûnên wan ên li welatên din, dixwaze dengê wan qut bike.
Kongreya Azadiya Îranê pêla nû ya bêdengkirin, bidarvekirin û kuştina li navxweyî ya welat, her wiha gavên xapînok ên di bin navê ewlehî û dîplomasiyê de yên li derveyî welat bi tundî şermezar dike. Konferansa “Na ji bo darvekirinê” ya ku bi înstiyatîfa Kongreya Azadiya Îranê û bi malvantiya Komeleya Dostaniya Îran û Fransayê ya li Parlamentoya Fransayê hat lidarxistin ku di encamê de daxwaza azadkirina zêdetirî 80 girtiyên di bin metirsiya darvekirinê de ji aliyê nûnerên Encûmena Neteweyî ya Fransayê ve hat kirin, gaveke herî krîtîk û serkeftî bû di pêngava rûbirûbûna van polîtîkayên hov de.
Kongreya Azadiya Îranê, li ser bingeha nirxên şoreşa ‘Jin, Jiyan, Azadî’, têkoşîna sivîl a gel û parastina pirrengiya navxweyî, dê xebatên xwe yên ji bo polîtîkayeke hevpar û cidî berdewam bike. Kongre, ji bo gihandina armancên xwe dê hemû derfet û amûrên siyasî bi kar bîne; da ku li Îranê aştî, azadî, demokrasî, dadperwerî û geşepêdana piralî pêk bê û dawî li her cure cudakariyê bê anîn.”
