Bernameya civînên gel ku DBPê bi dirûşma “Em aştiyê bi gelan re ava dikin” li Rihayê li dar xist, bi civînên li navçeyên Bêrecûk û Pirsûsê bi dawî bû.
Civînên gel ên Partiya Herêmên Demokratîk (DBP) ku bi dirûşma “Em aştiyê bi gelan re ava dikin” li Rihayê dabû destpêkirin, li navçeyên Bêrecûk û Pîrsûsê bi hevdîtinên gel bi dawî bûn. Hevserokê Giştî yê DBP’ê Keskîn Bayindir jî tevli civînan bû. Keskîn Bayindir û şandeya pê re pêşî çû gundê Fis Fis ê navçeya Bêrecûkê û li vir bi sedan kes tevli civînê bûn. Beriya civîna ku li qada gund hat lidarxistin, li dîwaran nivîsên “Tu bi xêr hatî Keskîn Bayindir” û “Gelê Kurd yek e” hatin nivîsandin.
‘Kurdan tu carî serî netewand’
Di civîna ku jinan eleqeyeke mezin nîşan da de Keskîn Bayindir û şandeya pê re bi dirûşmeyên “Bijî Serok Apo” hat pêşwazîkirin. Di civînê de wêneyên Rêberê Gelê Kurd Abdullah Ocalan hatin hilgirtin û li ser Pêvajoya Aştî û Civaka Demokratîk nîqaş hatin kirin.
Hevserokê Giştî yê DBPê Keskin Bayindir di civînê de axivî û wiha got: “Birêz Ocalan dixwaze pirsgirêka Kurd li ser masê û bi rêyên aştiyane çareser bike. Di dîroka Kurdistanê de qedera lîderên Kurd her wextê sêdar axaftin bû. Qedera gelê Kurd jî sirgûn û komkujî bû. Ji Koçgiriyê heta Dêrsimê, ji Geliyê Zîlan heta Çiyayê Agiriyê Kurd di komkujiyên mezin re derbas bûn. Xwestin Kurdan ji ziman û nasnameya wan dûr bixin. Lê Kurdan li hemberî van hemûyan tu carî serî netewand.”
‘Kurd dixwazin ev pêvajê bi aştiyê bi encam bibe’
Bayindir, pirsên welatiyan ên wekî “Ev pêvajo di çi astê de ye, çima ewqas dereng dimîne? Çima heta niha Rêber Apo di warê fîzîkî de azad nebûye?” wiha bersivand: “Di nav dewletê de du bask hene. Baskek hîn jî dixwaze polîtîkayên înkar û ewlehiyê bimeşîne. Baskê din jî ew e ku pê dihese ku bi şer tiştek bi dest nakeve. Ew jî dixwazin pêvajoyê bi diyalog û muzakeran bidomînin. Niha pêvajo li benda gavên qanûnî ye. Kurd di warê xwe de zelal û bi biryar in. Dixwazin pirsgirêka Kurd a ku 200 sal in didome bi diyalogê bidomînin û ev pêvajê bi aştiyê bi encam bibe.”
‘Aştî dê bi têkoşîneke mezin were’
Jinên tevli civînê bûn, pirsa “Şandeya Îmraliyê carna diçe hevdîtina Rêberê me Birêz Abdullah Ocalan. Gelo peyameke taybet a Rêberê me ji bo jinan heye?” pirsîn. Bayindir bi bîr xist ku Rêberê Gelê Kurd Abdullah Ocalan her tim destnîşan kiriye ku pêşengên Pêvajoya Aştî û Civaka Demokratîk jin û ciwan in û wiha pê de çû: “Ji bo vê yekê divê em li her qadê rêxistinbûna xwe mezin bikin. Aştî dê bi têkoşîneke mezin were.”
Keskîn Bayindir û şandeya pê re bi çepik û tilîliyan ji gundê Fis Fisê veqetiya û derbasî navçeya Pirsûsê bû. li Pirsûsê jî bi dirûşmeyan hat pêşwazîkirin û li wir jî bi welatiyan re li ser pêvajoyê nîqaş kirin. Welatiyan fikar û gumanên xwe yên li ser pêvajoyê anîn ziman û diyar kirin ku gavneavêtina dewletê ya di warê “Qanûna Çarçoveyê” de baweriya wan dişkîne. Welatiyan destnîşan kir ku ew di demek nêz de li benda azadiya fîzîkî ya Abdullah Ocalan in ku wî wekî muxatab û sernûnerê pêvajoyê dibînin.
Bi civîna Pirsûsê re, bernameya DBPê Rihayê ya ku bi dirûşma “Em aştiyê bi gelan re ava dikin” hatibû destpêkirin bi dawî bû. Şande ji bo civînên din derbasî Dîlokê bû.
