Malbatên Pîrsûsê di meha 131an a komkujiyê de diyar kirin ku polîtîkayeke aşkere ya bêcezahiştinê tê meşandin, lê ew ê tu carî dest ji doza edaletê bernedin.
Înîsiyatîfa Malbatên Pîrsûsê, di meha 131an a Komkujiya Pîrsûsê de li ber Navenda Çandê ya Turkan Saylanê daxuyaniyek da. Di daxuyaniyê de pankarta “Dê tu xeyal nîvco nemîne” hat vekirin û dirûşmeyên wekî “Kobanê em ê careke din werin” û “Ji bo Pîrsûsê edalet, ji bo her kesî edalet” hatin berzkirin.
‘Dewlet berpirsyaran vedişêre’
Di daxuyaniyê de hat bibîrxistin ku beriya 131 mehan, piraniya wan xwendekarên zanîngehê bi sedan kes ji bo avakirina bajarekî wêrankirî derketin rê û li navçeya Pîrsûsê ya Rihayê rûbirûyê êrîşeke bombeyî hatin. Di encamê de 33 “rêwiyên xeyalan” jiyana xwe ji dest dan û bi sedan kes jî birîndar bûn.
Înîsîyatîfê bal kişand ser doza Pîrsûsê û destnîşan kir ku faîlên rastî û berpirsiyar nehatine dîtin, doz tenê bi kesê êrîşkar re sînordar hatiye girtin û polîtîkayeke aşkere ya bêcezakirinê tê meşandin. Malbatan dan zanîn ku tevî agahiyên saziyên ewlehiyê yên li ser êrîşkar û şaneyên DAIŞê hebûn jî, lêpirsîneke bi bandor nehatiye kirin.
Her wiha hat destnîşankirin ku endamên înîsîyatîfê Hacer Elçin, Emrah Topaloglû, Ezgî Gurbuz, rojnamevan Pinar Gayip, birîndarên Pîrsûsê Ûgûr Ok û Şahîn Tumuklu û parêzer Sezîn Ûçar ku di operasyona 3yê Sibatê de hatibûn girtin, niha têkoşîna edaletê di girtîgehê de didomînin.
Înîsîyatîfê daxuyaniya xwe bi van gotinan bi dawî kir: “Xeyalên 33 rêwiyên me yên xeyalan dê nîvco nemînin. Em ê hesabê Pîrsûsê bipirsin û dê edalet teqez serbikeve”
Daxuyanî bi çalakiya rûniştinê bi dawî bû.
