Şaredarê Bajarê Mezin ê Îzmîrê Cemil Tugay, bi daxuyaniyekê rexne li biryarên dawî yên rêveberiya partiya xwe girtin. Tugay ragihand ku ew ji Partiya Gel a Komarê (CHP) îstifa kiriye û diyar kir ku ew ê ji niha û pê de wekî şaredarekî serbixwe wezîfeya xwe bidomîne.
Şaredarê Bajarê Mezin ê Îzmiîê Cemil Tugay, li ser Xê bi daxuyaniyeke nivîskî ji raya giştî re ragihand ku ew ji partiya xwe CHPê vekişiyaye. Di daxuyaniyê de bal kişand ser biryara ‘betalkirina teqez’ û dûrxistina serokên bajaran a ku van demên dawî de pêk hatine û ev biryar wekî “neheqiyeke mezin a li dijî vîna siyasî ya Îzmirê” pênase kir.
‘Biryarên îxracê cihê fikaran e’
Cemil Tugay di daxuyaniya xwe de anî ziman ku pêvajoya piştî biryara ‘betalkirina teqez’ zirarên mezin daye partiyê û got: “Bi taybetî biryarên îxracê yên ku van rojên dawî de li pey hev hatine girtin, cihê fikaran e û ev şaşiyeke mezin e ku nayê qebûlkirin.”
‘Hewldanên me yên dilsoz bêencam man’
Cemîl Tugay destnîşan kir ku heta niha bi gotin, helwest û bi îmzekirina ji bo kongreya awarte hewl daye ku partî vegere ser xeta xwe ya demokratîk, lê ev hewldan bêencam mane. Di berdewamiya daxuyaniyê de hat diyarkirin ku êdî rûbirûbûna vê bi rastiyê re neçarî ye û got: “Ez dibînim û fehm dikim ku hewldanên me yên dilsoz di dema ku em li bendê bûn de encamê nadin û li gel vê yekê gelek endamên partiya me bi awayekî neheq û nehiqûqî dibin hedef. Welatê me hewceyî bi CHPyeke welê heye ku ji her cûre wesayet û manîpulasyonan dûr be, ji bo maf û refaha gelê me bixebite. Lê belê ‘CHP ya betalkirinên teqez’ êdî ne banê vê têkoşînê ye.”
Wê bi awayeke serbixwe wezîfeya xwe bidomîne
Şaredarê Bajarê Mezin ê Îzmirê Cemil Tugay daxuyaniya xwe bi van gotinan bi dawî kir: “Bi van nêrîn û ramanên xwe, bi xemgîniyeke mezin û bi hêviya ku rojekê vegerim, ez ji endametiya Partiya Gel a Komarê (CHP) îstifa dikim. Di pêvajoya li pêşiya me de, ez ê wekî serbixwe wezîfeya xwe ya Şaredariya Bajarê Mezin ê Îzmirê bimeşînim û bi hemû hêza xwe xizmeta bajar û gelê me bikim.”
