Piştî rapora ji Buroya Sûc a Neteweyî, doza Rojwelat Kizmaz piştî du sal û nîvan ji nû ve hate lêkolînkirin. Li gorî raporê, telefona Rojwelat Kizmaz piştî kuştina Gulistan Doku bi 46 rojan girtî maye. Ev yek jî tîne bîra mirovan ku ka bê gelo gef li Rojwelat Kizmaz hatiye xwarin?
Rojwelat Kizmaz di 9ê Sibata 2024an de li Êlihê winda bû. Mirina wê bi guman bû. Cenazeyê wê li Gola Bendava Ilisuyê ya Êlihê hate dîtin. Doza derbarê mirina bi guman a Rojwelatê de bi biryara “bêbingeh e” ji aliyê dozgeriyê ve hatibû girtin. Di meha Nîsanê de, malbatê bi delîlên nû dîsa serî li Serdozgeriya Komarê ya Êlihê da. Malbatê xwest ku biryarên berê yên di doza Rojwelat de werin betalkirin, ji ber ku di doza Gulistan Doku de delîlên nû hatin tespîtkirin.
Hûrgiliyên telefonê
Li gorî nûçeya nûçegihana JinNewsê Şehrîban Aslan; her çend Rojwelat Kizmaz weke hevala herî nêzîk a Gulistan Doku tê zanîn jî mirina wê ya bi guman gelek pirs bi xwe re anîn. Îhtîmaleke din jî ev e ku Rojwelat şahidiya windabûna Gulistan kiriye, her tişt derbarê wê de dizanibû û ji ber vê yekê bi awayek bi guman jiyana xwe ji dest daye. Nimûneyek berbiçav a vê yekê ji lêkolîna Buroya Sûc a Neteweyî ya telefona Rojwelat Kizmaz derket holê.
Raporê rastî eşkere kir
Li gorî rapora Buroya Sûc a Neteweyî ya 22yê Nîsana 2025an, telefona Rojwelat Kizmaz yekser piştî windabûna Gulistan Doku hatiye qutkirin û 46 roj şûnde, di 20ê Sibata 2020an de, saet di 4:04 PM de, dîsa hatiye vekirin. Wekî din, lêkolîna telefona Rojwelat Kizmaz eşkere kir ku axaftina wê ya dawî bi telefonê di 5ê Adara 2024an saet di 2:47an de pêk hatiye.
Dosyeya Kizmaz neqlî Erziromê hate kirin
Beşek ji dosyeya Gulistan Doku li Erziromê dewam dike, lê hat diyarkirin ku piştî lêgerîna telefona wê, dosyeya Rojwelat Kizmaz jî neqlî Erziromê hatiye kirin.
