Şandeyek ji Zanîngeha Kobanê, tev li Konferansa 8emîn a ICABEPê ya li Polonyayê bû. Endamê Rêveberiya Zanîngeha Kobanê Şervan Muslim da zanîn ku ji bo hevkariya akademîk deriyên nû vebûne û mizgînî da ku hin zanîngehên Ewropayê xwestine zimanê Kurdî têxin nava bernameyên xwe yên akademîk.
Zanîngeha Kobanê li ser asta navneteweyî gavên girîng ên derbarê kar û xebatên akademîk de diavêje. Şandeyeke Zanîngeha Kobanê di 25ê Gulanê de li Enstîtuya Rêveberiyê ya Zanîngeha Szczecinê (Şçeçîn) ya Polonyayê, beşdarî Konferansa 8emîn a Jimêryarî, Karsazî, Aborî û Siyasetê (ICABEP 2026) bû. Zanîngeha Kobanê ku di heman demê de di nava komîteya amadekar a konferansê de cih digirt, bi nûnerên gelek zanîngehên cîhanê re hevdîtin pêk anîn.
Zimanê Kurdî dibe mijara bernameyên akademîk
Endamê Rêveberiya Zanîngeha Kobanê Şervan Muslim ê ku di nava şandeyê de bû, têkildarî encamên hevdîtinan û destkeftiyên ji bo perwerdehiya Rojavayê Kurdistanê agahî dan ANHAyê. Di encama hevdîtinan de, mijara perwerdeya bi zimanê Kurdî bû yek ji destkeftiyên herî mezin. Şervan Muslim diyar kir ku yek ji rojevên wan ên sereke zimanê Kurdî bûye û got: “Di encama nîqaşên me de, hin zanîngehên navneteweyî eleqeyeke mezin nîşan dan û daxwaza xwe anîn ziman ku ew dixwazin zimanê Kurdî derbasî nava bernameyên xwe yên akademîk bikin.”
‘Emê piştgiriya Kurdî bidin zanînehên Ewropayê’
Muslim destnîşan kir ku wekî Zanîngeha Kobanê ew ê ji bo vê gavê hemû piştgiriyê bidin û wiha axivî: “Me soz da wan zanîngehan ku em ê bi rêya şandina kadroyên perwerdeyê yên pispor ên zimanê Kurdî piştgiriyê bidin wan. Her wiha, em ê materyal û pirtûkên taybet ên bi zimanê Kurdî ji bo pirtûkxane û beşên wan zanîngehan dabîn bikin.”
Zanîngeha Kobanê di komîteya amadekar de cih girt
Têkildarî rola Zanîngeha Kobanê ya di konferansê de, Muslim bi bîr xist ku ev beşdarbûn di çarçoveya hevkariyeke fermî de pêk hatiye. Muslim da zanîn ku beriya salekê di navbera Zanîngeha Kobanê û Zanîngeha Szczecinê de peymaneke hevkariyê hatiye îmzekirin û li ser vê bingehê Zanîngeha Kobanê ketiye nava Komîteya Amadekar a Konferansê.
‘Derfetên hevgiriyê mezin bûn’
Muslim anî ziman ku ev konferans bûye derfetek ji bo naskirina zanîngehên navneteweyî û wiha domand: “Me bi nûnerên zanîngehan re rewşa perwerdehiyê, rêbazên pêşxistina wê û projeyên siberojê yên ji bo berjewendiya xwendekaran nîqaş kirin. Beşdariya me hişt ku asoyên hevkariya me ya akademîk ji Polonyayê heta bi tevahiya dewletên Ewropayê berfireh bibe.”
Dê li Ewropayê tûra dîplomasiyê bikin
Şervan Muslim ragihand ku xebatên şandeya wan wê piştî konferansê jî bidomin û ew ê li çend dewletên din ên Ewropayê geştan bikin. Muslim der barê armanca serdanên xwe yên li zanîngehên Ewropayê de ev peyam da: “Em ê ezmûnên xwe yên perwerdehiyê ji wan re pêşkêş bikin û rewşa xwendekarên Kobanê, êş û hêviyên wan vebêjin. Armanca me ew e ku em li ser asta akademîk firset û destkeftiyên baştir ji xwendekarên xwe re ava bikin.”
Di konferansê de çi hat nîqaşkirin?
Konferansa 8emîn a ICABEPê bi beşdariya akademîsyen, lêkolîner û pisporên ji gelek welatan, du rojan dewam kir. Di roja yekem a konferansê de li ser zehmetî û arasteyên nûjen ên di warên aborî, rêveberî û siyasetên giştî de rûniştinên zanistî û xelekên nîqaşê hatin lidarxistin. Di roja duyem de jî bi rêya online derfet hate afirandin ku lêkolîner lêkolînên xwe pêşkêş bikin û hevkariya navneteweyî xurttir bibe.
