Serokwekîla Koma DEM Partiyê Gulistan Kiliç Koçyîgît li Sêrtê axivî û diyar kir ku ew ê têkoşîna xwe li dijî polîtîkaya qeyûman a desthilatê bidomînin û got: “Hûn çiqas qeyûm tayîn dikin bikin jî em ê car din bi ser bikevin. Ev desthilata qeyûman desthilatek rûreş e.”
Li Sêrtê protestokirina tayînkirina qeyûmê ser Şaredariya Sêrtê berdewam dike. Îro jî rêxistinên DEM Partî û DBPê yên Batman, Şirnex û Mêrdînê hatin piştevaniya hevşaredarên Sêrtê. Piştî meşa hat lidarxistin, bi beşdariya Serokwekîla Koma DEM Partiyê Gulistan Kiliç Koçyîgît li ber avahiya şaredariyê daxuyanî hat dayîn.
Hevşeredar: Em nahêlin ku qeyûm rehet rûnê
Di daxuyaniyê de ewilî hevşeredara Sêrtê Sofya Alagaş axivî û anî ziman ku ew ê li dijî tayînkirina qeyûm berxwedana xwe bidomînin û got: “Qeyûm li wir bi rehetî nikare rûnê. Hatin nehatin dest bi dijminatiya gel kirin. Dixwazin karkeran ji kar derxînin. Em ê jî li dijî vê yekê li cem karkeran bin. Em ê kirinên qeyûm teşhîr bikin û rehetî nadin wan. Berxwedana me wê bidome.”
Hevşeredar Mehmet Kaysî jî destnîşan kir ku ew ê li dijî danîna qeyûm têkoşîna xwe bidomînin û wiha got: “Yên ku vîna gel nas nakin em jî wan nas nakin. Her roj qeyûm tayîn bikin jî em ê li dijî qeyûmên wan rabin. Em ê bi gelê xwe re ji bo ew rehet rûnenên çi ji destê me were em ê bikin.”
Koçyîgît: Çi dibe bila bibe em ê dîsa bi ser bikevin
Piştrê jî Serokwekîla Koma DEM Partiyê Gulistan Kiliç Koçyigit axivî. Gulistan Kiliç Koçyîgît diyar kir ku ew ê bi têkoşîna xwe dawiya desthilatê bînin û ev yek anî ziman:
“Ev desthilat bi salan e bi desteserkirin û dizîkirina vîna gel û zilmê dixwaze xwe li ser pêya bigire. Em bi desthilateke faşîst rû bi rû ne. Dixwazin bajarên me desteser bikin û xwe bi vê desteserkirinê li ser pêya bigirin. Gelek caran qeyûm tayîn kirin lê her carê me qewirand. Êşa wan jî ew e. Gelê Kurdistanê û DEM Partî li dijî yên zilmê dikin li ber xwe dide. Dixwazin tola hilbijartinê ji me hildin. Lê kesek jî ji DEM Partî bimîne wê serî netewîne. Bi dek û dolaban ceza dan hevşeredara me. Mutahîtên alîgir û parlamenterê AKPê yê Sêrtê jî bo rantê koalîsyon kirin û agahî dan Wezarete Karên Navxwe. Piştre jî biryara danîna qeyûm hat dayin.
Şerm û fedî bi van re tune ye. Li dijî vê pergala pûçbûyî têkoşîna me didome. Qeyûm polîsan berdide taxan û polîs bi çekan gule direşînin. Qaşo guleyan ji bo ‘ewlehiyê’ reşandin e. Yên ku ewlehiya vî bajarî dixe xetereyê qeyûm û polîs bi xwe ne. Helbet hûn ê hesabên van dek û dolaban bidin û bên darizandin. Weke ku dagir kirin e, ala xwe li vir daliqandin e. Dixwazin tawanbarî û sûcên xwe bi vê alê veşêrin. Em li vir dibêjin, hûn çiqas qeyûm tayîn dikin bikin jî em ê car din bi ser bikevin. Em ê li ber xwe bidin. Em ê vê desthilata faşîst ji vir biqewirînin.
Bi qeyûman aştî pêk nayê
Dibêjin; ’em ê aştiyê bînin’ lê bi van qeyûmên we aştî pêk nayê. Heke hûn rastî ji çareseriyê dixwazin divê hûn destpêkê dev ji van qeyûman û polîtîkayên faşîst berdin. Birêz Abdullah Ocalan dibêje, ‘divê ev pirsgirêk di zemîna hiqûqî de were çareserkirin. Lê desthilat li dijî ve yekê zextên xwe zêde dike. Rojnamegeran dikuje û digire, şeredariyan desteser dike. Heke hûn çareseriyê bixwazin divê hûn rêzê ji ziman, nasname û welatê gelê Kurd re bigirin. Êdî ji vê zilma we re bes e. Zilm hêrsa me û têkoşîna me mezin dike. Em ê tekoşîna xwe berfirehtir bikin. Ev desthilata faşîst wê biçe. Ev desthilat di dîrokê de wê weke desthilatek rûreş were penasekirin.”
