Wan – Şaredariya Rêya Armûşê, di çarçoveya “Seferberiya Paqijiyê” de li taxan û peravên Golan Wanê dest bi xebateke berfireh kir. Xebatkarên şaredariyê û endamên meclîsê bal kişandin ser hişmendiya ekolojîk û parastina xwezayê.
Şaredariya Rêya Armûşê bi hatina biharê re “Seferberiya Paqijiyê” da destpêkirin û duh li perava Gola Wanê 12 ton gilêş kom kir. Di çarçoveya seferberiyê de dê çalakiyên paqijiyê berdewam bikin û hişmendiya paqijiya hawirdorê di civakê de bê belavkirin. Xebatkarên şaredariyê û endamên meclîsa şaredariyê derbarê seferberiya dane destpêkirin nêrînên xwe vegotin û bal kişandin ser giringiya parastina ekolojiyê.
‘Paqijî berpirsyariya tevahiya civakê ye’
Xebatkar û endamên meclîsê yên Şaredariya Rêya Armûşê diyar kirin ku armanca wan a sereke ne tenê paqijkirina kolanan e, lê belê avakirina civakeke xwedîhişmend e û gotin: “Em îro wekî xebatkar û endamên meclîsê li qadê ne. Divê gelê me bizanibe ku paqijî ne tenê karê şaredariyê ye, berpirsyariya tevahiya civakê ye. Ji bo ku bajarê me, xweza û peravên Gola Wanê her tim paqij bimînin, pêwîst e em hemû bi hev re xwedî li nirxên xwe derkevin.”
