Şaxa Egîtîm Sen a Wanê, banga tevlibûna 3yemîn Sempozyûma Zimanê Kurdî ku bi mijara “Li Kurdistanê Rewşa Zimanê Kurdî û Perwerdehîya Bi Zimanê Kurdî” tê lidarxistin, kir.
Şaxa Sendîkaya Kedkarên Zanîstê û Perwerdehiyê (Egîtîm Sen) ya Wanê, têkildarî 3yemîn Sempozyûma Zimanê Kurdî ku dê di 16 û 17ê Gulanê de li Eywana Tahîr Elçî ya Baroya Wanê were lidarxistin, li avahiya xwe ya navçeya Rêya Armûşê daxuyaniyek da. Sempozyûm dê îsal mijara “Li Kurdistanê Rewşa Zimanê Kurdî û Perwerdehîya Bi Zimanê Kurdî” bi tevlibûna gelek kesayetên navûdeng bê lidarxistin. Endam û rêveberên Egîtîm Senê tev li daxuyaniyê bûn.
‘Li dijî bişavtinê hewldanên me ne bes in’
Berdevkê Lijneya Ziman a Egîtîm Senê Lokman Babat di daxuyaniyê de axivî û got: “Em dizanin ku li hemberî bişavtina zimanê Kurdî hewldanên me û hewldanên sazîyên wekî me serbixwe ne bes in. Wekî her sal me gotî dîsa em dubare dikin. Kurd hevwelatîyên vê dewletê ne û berpirsyariya dewletê heye. Divê xizmeta ji bo Tirkî tê kirin ji bo Kurdî û hemû zimanên din jî bê kirin. Ev yek berpirsyariya dewletê ye û tunekirin û bişaftina zimanan sûc e.”
‘Wê dawiya sempozyûmê weke forûmekê be’
Lokman Babat bal kişand ser mijara sempozyûmê û wiha pê de çû: “Dê ji zanîngehên Başûr, Rojava û ji saziyên bakur gelek mêvanên me yên di qada xwe de pispor beşdar bibin. Sempozyûma me dê li eywana Baroya Wanê ya Parêzer Tahîr Elçî be û wekî her sal dê du rojan bidome. Banga me ji hemû sazî, pêkhate û kesên dildarên zimanê Kurdî ne, ye. Werin beşdarî sempozyûma me bibin. Her wiha me îsal beşek li sempozyûmê zêde kir. Dê rûniştina dawî ya sempozyûmê wekî forumê pêk bê. Kesên dixwazin nêrînên xwe bînin ziman û dikarin di vê beşê da tev li sempozyûmê bibin.”
Piştî axaftina Lokman Babat daxuyanî bi dawî bû.
