Malbata girtiyê Kurd Naser Bekirzade ku rejîma Îranê cezayê darvekirinê lê birîye, bertek nîşanî biryarê da û banga hestiyariyê kir.
Malbata girtiyê Kurd Naser Bekirzade (26) ku rejîma Îranê cezayê darvekirinê lê biriye û ji aliyê Dadgeha Bilind ve cezayê wî hatiye erêkirin, banga hestiyariyê li raya giştî kir. Dayîk û bavê Bekirzade bi vîdeoyekê bertekeke tund nîşanî biryara darvekirinê dan û xwestin ku înfaza cezayê mirinê demildest bê rawestandin.
Bertek nîşanî pîvajoya darizandinê dan
Malbatê di peyama xwe de bal kişand ser bêhiqûqiya pêvajoya darizandinê û wiha got: “Naser tu sûc nekiriye. Heke kurê min tiştek kiribûya, çima cezayê wî du caran hat betalkirin?”
Israra darizandin û darvekirinê
Naser Bekirzade ku li Girtîgeha Navendî ya Urmiyeyê tê ragirtin, bi îdiaya “ji bo Îsraîlê sîxurî kiriye” cezayê darvekirinê lê hatibû birîn. Ev cezayê ku li Bekirzade hatibû birîn berê du caran hatibû xirakirin. Lê belê di meha Çileyê de, di encama darizandina ji nû ve ya ji aliyê Şaxa 2yemîn Dadgeha Şoreşê ya Urmiyeyê ve, bi heman sûcdariyê careke din biryara darvekirinê hat dayîn.
‘Sûcê min ê yekemîn Kurdbûn e’
Roja 25ê Nîsanê, Bekirzade gazî Buroya Înfazê ya Girtîgeha Navendî ya Urmiyeyê hat kirin û agahiya ku Dadgeha Bilind cezayê wî yê darvekirinê erê kiriye jê re hat ragihandin.
Bekirzade li hemberî vê biryara rejîma Îranê ev bertek nîşan dabû: “Sûcê min ê yekemîn ew e ku ez Kurd im, yê duyemîn jî ew e ku ez Sunî me. Ez ne yê yekemîn im û ne jî yê dawî me.”
