Şirnex – Rêxistinên DBP û DEM Partiyê yên Şirnexê, Serokê HADEPê yê navçeya Silopiyayê Serdar Taniş û rêveberê HADEPê Ebûbekîr Denîz ku 24 sal berê hatibûn windakirin bi bîr anîn.
Serokê HADEPê yê navçeya Silopiyayê Serdar Taniş û rêveberê HADEPê Ebubekîr Denîz 24 sal berê hatibûn binçavkirin û windakirin. Endam û rêveberên DEM Partî û DBPê di salvegera 24emîn a windakirina wan de, li ber avahiya DEM Partiyê ya Silopiyayê daxuyanî dan. Malbatên Serdar Taniş û Ebûbekîr Denîz, rêxistinên DBP û DEM Partiyê yên Şirnex û navçeyên wê, parlamenterê DEM Partî yê Şirnexê Mehmet Zekî Îrmez, endam û nûnerên saziyên sivîl û gelek kes tevlî daxuyaniyê bûn. Di daxuyaniyê de pankarta ku wêneyên Serdar Taniş û Ebubekîr Denîz û nivîsa “Ew ji sala 2001an û vir ve winda ne” dinivisî bû hilgirtin. Girseyê dîsa wêneyên Serdar Taniş û Ebûbekîr Denîz jî hilgirtin. Hevserokê DEM Partî yê Silopiyayê Îdban Kaplan daxuyanî xwend û bi bîrxist ku Serdar Taniş û Ebûbekîr Denîz piştî ku çûnê qeraqolê li qereqolê winda bûn û tu agahî ji wan nehatiyê standın. Îdban Kaplan, da zanîn ku ji roja ku hevalên wan hatinê windakirin vir ve weke partî û malbatên wan têkoşîna xwe ya pêkhatina edaletê didomînin û wiha got: “Di şaxsê wan de heta ku kujerên bi deh hezaran kesan hatinê windakirin hesap bidin em ê têkoşîna xwe bidomînin.”
‘Çavê me li derî ye’
Piştî daxuyaniyê keça Ebûbekîr Denîz Ceylan Denîz axivî û anî ziman ku 24 sal in aqubeta bavê wê nehatiyê ronîkirin û got: “Çavê me hîna jî li derî ye. Heta temenê min hinek mezin bû min nedizanî bavê min hatiyê windakirin. Piştrê ez hîn bûm. Ez hîna biçûk bûm em çûn Kerboranê. Lê wê deme hestiyên me jî nedan. Her sal em hestiyên xwe dixwazin. 24 sal in tu bersiv nedan me. Em li kesên tiliya wan di windakirinê de heye gilî dikin. Em ê heta dawiyê li pêy şopê bin.”
‘Emê heta encamê têbikoşin’
Piştrê bavê Serdar Taniş Şuyaîp Taniş axivî û bi lêvkir ku tevî 24 sal derbasbûne jî faîl nehatine cezakirin û wiha axivî: “24 salin me tu encam negirt. Em dixwazin faîlen hemû kesên hatinê windakirin bên cezakirin û cenazeyên wan radest bikin. Tu sûcê Serdar û Ebûbekîr tune bû. Em dixwazin hemû kesen bi wicdan li ser vê dozê bisekinin. Faîlen me, ne veşartine ne. Aşkera ne. Faîle me fermandarê cendirmeyan Levent Ersoz e. Çend caran gef li me xwaribû. Ji ber wê em dixwazin ben cezakirin. Heta bên cezakirin û cenazeyên me bidin emê doz û têkoşîna xwe bidomînin.”
‘Em tu carî wan ji bir nakin’
Di dawiyê de parlamenterê DEM Partî yê Şirnexê Mehmet Zekî Îrmez jî axivî û diyar kir ku ji bo aştiyek bi rûmet pêk bê divê faîlên hemû kesên hatinê windakirin bên cezakirin û got: “Her du hevalên me ji ber fikir û ramanên xwe hatin windakirin. Em dizanin ew pergala netew dewlet ji bilî tirkbûne tu netewan nasn ake û tune dihesibîne. Bi hezaran kurd hatin windakirin. Bi komkujiyan re rû bi rû man. Ew pergal li ser qirkirinê hatiyê rûnistandin. Em jî dibêjin faîlen wan diyar in. Faîl rayedarên dewletê yên Sirnexê bi xwe bûn. Heta ku faîl hesap nedin em dev jî têkoşîna xwe bernadin. Niha qala aştiyê dikin. Ew hamle ji aliye Birêz Abdullah Ocalan ve hat destpêkirin. Ji bo pirsgirêka kurd bê çareserkirin û aştî pek bê divê komisyona heqîqetê bê avakirin û faîl bên cezakirin. Em tu car wan ji bîr nakin û nadin ji bîrkirin.”
