Îro li navenda PYDê ya bajarê Qamişloyê şandeyeke siyasî ya hikûmetê û PYDê li hev civiyan û li ser mijarên siyasî û misogerkirina mafan nîqaş kirin.
Di çarçoveya entegerasyonê û pêkanîna bendên peymana 29ê Çileyê ya ku di navbera fermandarê Hêzên Sûriya Demokaratîk Mazlûm Ebdî û Serokê Hikûmeta Demkî Ehmed Şara de pêk hat, îro li navenda PYDê ya bajarê Qamişlo şandeyeke siyasî ya hikûmetê û PYDê li hev civiyan.
Şande bi serokatiya serokê nivîsgeha siyasî ya parêzgeha Hesekê Hesen Ebas û hevserokên Meclîsa Rêveber a Kantona Cizîrê Vîviyan Beho, Hesen Şero û şêwirmenda Rêveberiya Xweser Jiyan Hesen pêk tê.
Şande ji aliyê hevserokê Partiya Yekîtiya Demokratîk (PYD) Xerîb Hiso, endama desteya hevserokatiyê ya partiyê Foza Yûsif û hevserokên nivîsgeha têkiliyên giştî ya partiyê Sema Bekdaş û Silêman Ereb ve hatin pêşwazîkirin.
Civîn ji ragihandinê girtî hate lidarxistin, piştî ku bi dawî bû, beşdaran daxuyanî dan ragihandinê.
Di vê çarçoveyê de, hevserokê PYDê Xerîb Hiso, wiha got: “Ev cara yekem e ku serdanek wiha ji hêla desteya siyasî ya hikûmeta demkî ve pêk tê, ji ber ku wan serdana partiyên siyasî û partiya me kir. Em wê wekî gavek nû û erênî dibînin, ji ber ev cara yekem e ku gavên wisa di dîroka Sûriyeyê de têne avêtin, em hêvî dikin ku gavên din jî piştî wê werin.”
Derbarê naveroka civînê de Hiso got: “Di nîqaşên me de, me li ser rewşa Sûriyeyê û pirrengiya wê û li ser pêwîstiya garantîkirina mafan bi rêya qanûnê sekinîn. Me girîngiya serdana hemû partîyên sîyasî yên Kurd û pêkhate û alîyên din destnîşan kir,”. Her wiha pêwîst e qanûnên nû werin derxistin ku her kes bikaribe erkên xwe bi azadî û rehetî pêk bîne, ji bilî destûreke nû ji bo welêt.
Derbarê hilbijartinan de Hiso diyar kir ku komîteyên taybet heye, ev komîte siyasî ye ku bi paşeroja Sûriyeyê re eleqedar e. Ji ber vê yekê serdan hejmarek partiyên siyasî kir. Di dema pêş de Komîsyona Hilbijartinê wê daxuyaniyekê bide, mijara hilbijartinên pêş de jî hate nîqaşkirin.
Hiso destnîşan kir ku şande bi malbatên girtiyan re jî civiya ku li ber avahiya partiyê, cihê civînê, xwepêşandan li dar xistin û got: “Di demek nêzîk de hemû girtî dê werin berdan.”
Endamê Desteya Siyasî li parêzgeha Hesekê Usama Şêx Elî anî ziman ku ev sardana wan ya yekem e bo parêzgeha Hesekê. Wê hewl bidin ku vê qonaxê bikin sernavek ji bo avakirina çandeke siyasî ya nû li ser bingeha diyalog û nîqaşê li ser hemû mijarên ku gelê me yê Sûriyeyê bi hemû cihêrengiya xwe eleqedar dike.
Her wiha Usama Şêx Elî di nava axaftinên xwe de wiha got: “Em ê bi partîyên siyasî, tevgeran û çalakîyên civakî re danûstandinê bidomînin.”
Hate diyarkirin ku şande piştre ber bi ENKSê ve çû.
