27 welatên endamên Yekîtiya Ewropayê, li ser daxwaza Îspanya û hin dewletên endam, wê sibê peymana hevkariyê ya bi Îsraîlê re nîqaş bikin.
Wezîrên karên derve yên Yekîtiya Ewropayê (YE), ji bo nirxandina peymana hevkariyê ya ku bingeha têkiliyên dîplomatîk û bazirganî ya bi Îsraîlê re pêk tîne, sibê li Luksembûrgê dicivin.
Nûnera Bilind a Polîtîkayên Ewlehî û Têkiliyên Derve ya YEyê Kaja Kallas, beriya civînê daxuyanî da çapemeniyê û piştrast kir ku dewletên endam ev mijar anîne rojevê. Kallas derbarê encama hevdîtinan de helwesteke bi baldarî nîşan da û got: Heke dewletên endam vê yekê bixwazin, emê sibê li ser biaxivin.
Tê payîn ku di hevdîtinan de bal bikişînin ser du senaryoyên sereke: Betalkirina bi tevahî peymanê: Ev banga ku roja yekşemê ji aliyê Îspanyayê ve hatibû kirin, yekdengiya 27 welatên endam dixwaze. Di konjoktura siyasî ya heyî de ev îhtîmal kêm tê dîtin.
Rawestandina beşa bazirganiyê: Ev gava ku ji aliyê Komîsyona Ewropayê ve hatî pêşniyarkirin, dikare bi piraniya dengan pêk bê.
Kaja Kallas destnîşan kir ku divê pêşî bê nirxandin ka di mijara tevdîrên bazirganiyê de pêşketineke berbiçav çêdibe yan na? Di hevdîtinên nefermî yên berê de, ji ber ku hin dewletên endam û di serî de Almanya li dijî rawestandina peymana bazirganiyê derketibûn, piraniya pêwîst nehatibû dabînkirin û ji ber vê yekê hîn biryarek nehatiye girtin.
