Êrîşa bi palayan a li dijî xwendekarên Zanîngeha Egeyê yên ku belavok belav dikirin pêk hat, bi daxuyaniyeke çapemeniyê hat şermezarkirin. Rêxistinên xwendekaran diyar kirin ku ev êrîş çavtirsandineke organîzekirî ye.
Li Zanîngeha Egeyê di 14ê Nîsanê de saet li dor 17.00an, li dijî xwendekarên endamên Sendîkaya Xwendekaran ku li ber derketina metroyê belavok belav dikirin, êrîşeke bi palayan pêk hat. Ji bo bertek nîşandana vê êrîşê, îro rêxistinên xwendekaran li ber derketina metroyê belavok belav kirin û piştre saet di 19.00an de li Qada Kucukpark a Bornovayê daxuyaniyeke çapemeniyê dan. Di daxuyaniyê de pankarta “Li zanîngehan rê ji çeteyan re tune, em ê pergala we ya reş hilşînin” hat vekirin û gelek caran dirûşmên “Ege dê bibe gora faşîzmê”, “Bijî piştevaniya xwendekaran” hatin berzkirin.
Daxuyaniya çapemeniyê li ser navê rêxistinan, ji aliyê endamê Partiya Karkerên Tirkiyeyê (TÎP) Tuna Atli Uysal ve hat xwendin. Piştre li ser navê Sendîkaya Xwendekaran, xwendekara Zanîngeha Egeyê Berîl Aktaş axivî.
‘Ev êrîş çavtirsandineke organîzekirî ye’
Tuna Atli Uysal diyar kir ku xwendekarên endamên Sendîkaya Xwendekaran ên ku jehrîbûna xwarinê ya li wargehan û destdirêjiyên li zanîngehan protesto dikirin û ji bo balê bikşînin ser van pirsgirêkan belavok belav dikirin, rastî êrîşa komeke faşîst a organîzekirî ya bi pala û şivên hesinî hatine û got: “Ev êrîş ne tesadufî ye, çavtirsandineke organîzekirî ye ku li dijî daxwazên mafên herî bingehîn ên xwendekaran hatiye kirin. Ev êrîş berhema hişmendiya paşverû û faşîst e ku dixwaze zanîngehan bêdeng bike û ciwanan bitirsîne. Êrîşkar bi gotina ‘em ê we bikujin’ tekbîr anîne; ev yek bi zelalî nîşan dide ku ev tundî ne tenê fîzîkî ye, di heman demê de êrîşeke nefretê ya îdeolojîk e.“
‘Ev ne kêmasiya ewlehiyê ye, tercîheke siyasî ye’
Tuna Atli Uysal da zanîn ku tevî nasnameya êrîşkaran tê zanîn û dîmen li holê ne, heta vê saetê kesek jî nehatiye binçavkirin û got: “Li Tirkiyeyê xwendekar ji ber ku mafê stargehê diparêzin, daxwaza xwarina saxlem dikin û li dijî destdirêjiyê dengê xwe bilind dikin bi palayan rastî êrîşê tên; li vir êdî ne tenê ‘kêmasiya ewlehiyê’, lê tercîheke siyasî ya aşkera heye.”
‘Gelo ewlehiya dibistanê di destê çeteyên faşîst de ye?’
Piştre li ser navê Sendîkaya Xwendekaran, xwendekara Zanîngeha Egeyê Berîl Aktaş axivî. Berîl Aktaş destnîşan kir ku bûyerên duh qewimîne ne tenê bûyer in lê hewldanên ji bo bêdengkirina xwendekarên ku li zanîngehan difikirin, dipirsin û dixwazin paşeroja xwe bi destên xwe ava bikin û got: “Yên ku kampusên me pêşkêşî çete û firoşkarên hişbirê dikin, vê wêrekiyê ji wan hêlînên tarî yên terîqat û cemaetan digirin ku pişta xwe dane wan! Em ji vir bi aşkerayî ji rektor Musa Alci dipirsin; wezîfedarên ewlehiyê yên ku divê xwendekarên xwe biparêzin, dema ku mil bi milê çeteyên destbixwîn ketin û hevalên me derb kirin, talîmat ji kê girtin? Gelo ewlehiya vê dibistanê di bin fermana çeteyên faşîst de ye?”
Daxuyaniya çapemeniyê piştî dirûşman bi dawî bû.
