Hevserokatiya Konseya Rêveber a KCKê, bi peyamekê Nizar Amêdî ku wekî Serokkomarê Iraqê hate hilbijartin, pîroz kir. KCKê di peyama xwe de destnîşan kir ku bendewariya sereke ya gelên herêmê gavavêtina ji bo demokratîkbûnê ye.
Hevserokatiya Konseya Rêveber a KCKê derbarê hilbijartina Serokkomariya Iraqê de peyamek weşand. Di peyama pîrozbahiyê ya KCKê de, ji bo wezîfeya wî ya nû serketin ji Nizar Amêdî re hate xwestin û hate diyarkirin ku hêvî dikin ev hilbijartin hem ji bo Iraqê, hem jî ji bo gelê Kurd û Rojhilata Navîn bibe wesîleya xêr û aramiyê.
‘Berpirsyariyên dîrokî û giran in’
KCKê di peyama xwe de bal kişand ser pêvajoya li Kurdistan û Rojhilata Navîn tê jiyîn û destnîşan kir ku destpêkirina wezîfeyeke wiha di qonaxeke ewqas krîtîk de, berpirsyariyên giran bi xwe re tîne. Di daxuyaniyê de hate bibîrxistin ku şer û têkoşîna berjewendiyan a li Rojhilata Navîn, pirsgirêkên heyî yên Iraqê hîn girantir û kûrtir dikin.
‘Gelê Kurd dînamîka herî xurt a demokratîkbûnê ye’
Têkildarî rola gelê Kurd û çareseriya pirsgirêkên siyasî, KCKê diyar kir ku gelê Kurd di encama têkoşîneke demdirêj û berdêlên giran de, li herêmê veguheriye hêza herî dînamîk a demokratîkbûnê û civakeke polîtîk a rêxistinkirî.
‘Şer û înkar dibe sedema êşên giran’
Peyama KCKê wiha berdewam kir: “Çareseriya siyasî û demokratîk a pirsgirêka Kurd, wê rasterast xizmetê ji çareseriya pirsgirêkên herêmê re jî bike. Bi têrkerî îspat bûye ku li Rojhilata Navîn tenê bi demokratîkbûnê pirsgirêk dikarin bên çareserkirin. Rêbazên li derveyî vê yekê nikarin çareseriyê biafirînin. Şer û înkara ku dibe sedema êşên giran, neteweperestî, mezhebperestî û tekperestî tenê pirsgirêkan aloztir dikin. Demokratîkbûn rêya çareseriyê ye û bendewariya bingehîn a gelên herêmê jî ev e.”
Di dawiya peyamê de, Hevserokatiya Konseya Rêveber a KCKê careke din baweriya xwe anî ziman ku baweriya wan heye ku Serokkomarê nû yê Iraqê Nizar Amêdî wê ji bo pêkanîna demokratîkbûnê ku daxwaza sereke ya gelê Kurd û gelên herêmê ye, kar û xebatên xurt bike.
