Piştî vekişîna YNKê ji hikûmeta demborî ya Herêmê û gefa du îdareyiya Herêmê, Serokê PDKê Mesûd Barzanî daxwaz ji YNKê kir ku li gel PDKê rûne, pirsgirêkan çareser bike û dawî li qeyranên siyasî yên Herêmê bînin. Her wiha Barzanî daxwaz ji aliyên din ên siyasî jî kir ku tev li avakirina hikûmetek berfireh bibin.
Li ser navê Baregeha Barzanî, Serokê PDKê Mesûd Barzanî daxuyaniyek li ser qeyrana siyasî ya li Herêma Federal a Kurdistanê belav kir û daxwazek pêşkêşî YNKê kir.
Di daxuyaniyê de Barzanî daxwaz ji YNKê dike ku li gel PDKê rûne, pirsgirêkan çareser bikin û dawî li qeyranên siyasî yên Herêma Federal a Kurdistanê bînin.
Her wiha Barzanî bang li aliyên din ên siyasî yên Herêma Kurdistanê jî dike ku tev li pêngavên ji bo pêvajoya siyasî ya Herêma Kurdistanê bibin. Barzanî daxwaz ji hemû aliyên siyasî dike ku bihevre hikûmetek bingeh fireh û neteweyî ava bikin, bersiva daxwaz û xwestekên xelkê Kurdistanê bidin.
Ev demek e ku du sal zêdetirin hilbijartina parlamentoya Herêma Kurdistanê pêk hatiye, lê ji ber berjewendiyên hizbî û dabeşkirina postan, heta niha kabîneya nû ya hikûmeta Herêma Kurdistanê nehatiye avakirin. Di rojên borî de PDK bêyî ku pirsa xwe bi aliyên din ên siyasî bike, civîna parlamentoyê bi tevilbûna 52 parlementeran lidarxist û desteya serokatiya parlamentoyê hilbijart.
Di beramber de encûmena serkirdayetiya YNKê civiya û piştre Serokê YNKê Bafil Talebanî peyamek bi dîmen belav kir û vekişîna YNKê ya ji hikûmeta demborî ya Herêmê ragihand. Talebanî ragihand ku ew itraf bi civîna parlamentoyê nakin û diyar kir ger PDK li Hewlêrê serokê Herêmê û serokwezîr diyar bike, ew ê jî li Silêmaniyê heman postan diyar bikin.
