Partiya Demokrata Kurdistanê ya Îranê eşkere kir ku endamê heyeta Îranê ya muzakereyan Mihemed Ceferî Sahraroudî kujerê Qasimlo ye û derbarê wî de biryara girtinê ya navneteweyî heye.
Partiya Demokrat a Kurdistana Îranê (PDKÎ), derbarê muzakereyên ku li paytextê Pakistanê, Îslamabadê di navbera DYA û Komara Îslamî ya Îranê de dest pê kirin, daxuyaniyeke tund belav kir. PDKÎyê hişyarî da ku divê ev hevdîtin wekî gaveke ber bi aştiyê ve neyên dîtin û bal kişand ser nasnameya şandeya Îranê.
‘Şandeya Îranê nîşana sîstema mîlîtarîst e’
PDKÎ di daxuyaniya xwe de destnîşan kir ku pêkhateya şandeya Îranê karakterê rastîn şê rejîmê nîşan dide. Di daxuyaniyê de hat gotin ku serokatiya şandeyê ji aliyê Mihemed Baqir Qalîbaf ve tê kirin ku ew kesekî nêzî Supaya Pasdaran e (IRGC) û di bernameyên nukleerî û mûşekî de xwedî roleke navendî ye.
‘Amadebûna kujerê Qasimlo heqareta li edaletê ye’
Yek ji xalên herî balkêş yên daxuyaniya PDKÎyê, beşdariya Mihemed Ceferî Sahraroudî ya di şandeyê de ye. PDKÎ diyar kir ku Sahraroudî rasterast bi suîqesta Dr. Ebdulrehman Qasimlo re peywendîdar e û derbarê wî de biryara girtina navneteweyî heye. PDKÎyê ev yek weke “heqaretek li şandeya Amerîkayê, li qurbaniyên terorê û li pîvanên hiqûqî” pênase kir.
‘Muzakere amûreke ji bo qezenckirina wext e’
PDKÎ hişyarî da Komara Îslamî muzakereyan ne ji bo çareserkirina pirsgirêkan, lê belê ji bo “qezenckirina wext û xurtkirina polîtîkayên xwe yên bêîstîkrar” bikar tîne. Di daxuyaniyê de hat gotin ku têkildariya bi sîstemeke wiha re, dibe sedema rewakirina terorîzm û binpêkirinên mafên mirovan.
Banga ji bo civaka navneteweyî
PDKÎyê bang li civaka navneteweyî û dewletên demokratîk kir ku di navbera gelên Îran û Kurdistanê û rejîmeke terorîst de hilbijartina xwe bikin. PDKÎ xwest ku berpirsên terora dewletê werin darizandin û piştgirî bidin têkoşîna azadiyê ya gel.
