Piştî ragihandina agirbesta demkî ya di navbera Dewletên Yekbûyî yên Amerîkayê (DYA) û Îranê de, her du alî bi daxuyaniyên nakok ketin pêşbirka serkeftinê. Wezîrê Parastinê yê DYAyê Pete Hegseth angaşt ku binesaziya Îranê bi tevahî hatiye tunekirin, Serokkomarê Îranê Mesûd Pezeşkiyan jî angaşt ku agirbest encama serkeftina wan e.
Piştî ragihandina agirbesta demkî ya di navbera Dewletên Yekbûyî yên Amerîkayê (DYA) û Îranê de daxuyaniyên dualî berdewam dikin. Rêveberiya Washingtonê îdîa dike ku binesaziya leşkerî ya Îranê bi temamî rûxandine. Îran jî angaştên berovajî tîne ziman.
Hegseth: Me binesaziya leşkerî ya Îranê rûxand
Wezîrê Parastinê yê DYAyê Pete Hegseth, di civîneke çapemeniyê de encamên êrîşên asmanî parve kirin û îdîayên giran anîn ziman. Hegseth, îdîa kir ku wan binesaziya pîşesaziya parastinê ya Îranê bi temamî ji holê rakiriye û got ku Îran êdî nikare moşek, roket û balafirên bêmirov (SÎHA) hilberîne. Li gorî bîlançoya ku Hegseth parve kiriye, hêzên DYAyê li Îranê zêdetirî 13 hezar hedef tune kirine û di nav van de ji sedî 80yê pergalên parastina asmanî ya Îranê hene.
Ji fermandarê Amerîkî gefa nûklîerî: Em ê ûranyûmê bigirin
Li gel daxuyaniyên wezîr, Serfermandarê Giştî yê DYAyê Orgeneral Dan Caîne jî peyamên tund da. Caîne, agirbestê tenê wekî “navberekê” bi nav kir û diyar kir ku artêşa wan her kêliyê amade ye ji nû ve dest bi êrîşan bike. Caîne, bi taybetî li ser bernameya nûklîerî ya Îranê sekinî û bi zimanekî gefwarî wiha got: “An Îran dê ûranyûma xwe ya zengînkirî bide me, an jî em ê bi xwe biçin bigirin.” Ev daxuyanî nîşan dide ku DYA agirbestê ne wekî çareseriyekê, lê wekî navgînek zextê bi kar tîne.
Pezeşkiyan: Rêgezên Îranê hatin qebûlkirin
Li aliyê din, Serokkomarê Îranê Mesûd Pezeşkiyan li ser hesabê xwe yê medaya civakî agirbest wekî “serkeftineke dîplomatîk” pênase kir. Pezeşkiyan îdîa kir ku di vê peymanê de rêgezên sereke yên Îranê hatine qebûlkirin û ev encam wekî “berhema xwîna şehîdan û serkeftina gel” bi nav kir. Tevî ku bîlançoya li qadê nîşan dide ku Îranê derbên giran xwarine, rêveberiya Tehranê hewl dide bi rêya retorîka serkeftinê moralê raya giştî ya navxweyî bilind bike û lawaziya xwe ya leşkerî veşêre.
Agirbest an amadekariya şerekî mezintir?
Her du alî jî di daxuyaniyên xwe de ji rastiya şer û wêraniya li qadê zêdetir, girîngiyê didin propagandaya siyasî. Dema ku DYA bi bîlançoyên giran hewl dide Îranê wekî hêzeke “qediyayî” nîşan bide, Îran jî bi îdîayên “serkeftinê” rastiya derbên ku xwariye ji nedîtî ve tê. Ev nêzîkatiya her du aliyan nîşan dide ku agirbesteke mayînde ne di rojevê de ye û her du hêz jî ji bo qonaxeke nû ya rageşiyê amadekariyê dikin.
