Lijneya Kordînasyona Bajêr a TMMOBa Êlihê li dijî guhertina îmara nêzîkî Nexweşxaneya Bajêr a Êlihê ya ji hêla Şaredariya Êlihê ya di bin rêveberiya kayim de ye hatiye kirin, daxuyanî da û xwest ku îmara ku hatiye guhertin were betalkirin.
Lijneya Kordînasyona Bajêr a Yekîtiya Odeyên Endezyar û Mîmarên Tirk (TMMOB) a Êlihê li dijî guhertina îmara nêzîkî Nexweşxaneya Bajêr a Êlihê ya ji hêla Şaredariya Êlihê ya di bin rêveberiya kayim de ye tê çêkirin, li Parka Yilmaz Guney a taxa Bahçelîevlerê daxuyanî da. Rêveber û endamên DEM Partî û DBPê, ÎHDa Êlihê, OHD, Egîtîm Sen, SES û şaxên girêdayê TMMOBê beşdarî daxuyaniyê bûn. Di daxuyaniyê de pankarta “Cihê parkan nayê guhertin, ji bazirganiyê re nayê vekirin” hatibû nivîsandin, hate vekirin.
Daxuyaniyê ji aliyê berdevkê TMMOBê Şehîn Bavlî ve hate xwendin. Şahîn Bavlî diyar kir ku guhertina plana îmarê ya ji hêla Şaredariya Êlihê ya di bin rêveberiya kayim de ye ne li gorî berjewendiya giştî ye û got: “Bi guhertina planê re beşek qadên parkên ku tên bikaranîn ji bazirganiyê re tên vekirin û li beramberî vê yekê pêşniyara ku li cihên cuda parkên nû bên çêkirin tên kirin. Ev cihên parkên nû yên tên pêşniyarkirin li herêmên dûr in û xwegihandina van parkan zehmet e.”
Bavlî diyar kir ku wekî Lijneya Koordînasyona Bajêr a TMMOBa Êlihê guhertina planên bi vî rengî ku rasterast bandorê li pêşeroja bajêr dikin, divê li gorî berjewendiyên giştî û rêgezên plansaziya zanistî werin nirxandin û xwest ku guhertina planê were betalkirin.
