Ligel meşandina nîqaşên agirbestekê û gefên dualî êrişên DYA-Îsraîlê yên li ser binesaziya leşkerî û aborî ya Îranê şevê din bi awayek giranî berdewam kir. Ligel hedefên li Îranê, hedefên komên nêzîk rejîma Îranê yên li Irak, Sûriye, Yemen û Libnanê jî bûn hedefa êrişên giran. Serokê Tora Îstîxbaratê ya Parazvanên Şoreşê Majîd Xademî di êrişekê de hate kuştin û Pergala S-300 a hewayî hedef hate girtin.
Şerê Îsraîl-DYA û Îranê di roja 38an de berdewam dike. Li aliyekê nîqaşên agirbestê yên di navbera Îran û DYAyê de didomin û li aliyê din jî hem gef hem êrişên dualî berdewam dikin. Piştî Îranê duh hind daxwazên DYAyê red kirin, şevê hem li Îranê hem jî li dijî komên girêdayî rejîmê yên li Sûriye, Libnan, Iraq û Yemenê êrişên giran pêk hatin. Balkêş e ku vê carî giraniya êrişan binesaziya sivîl jî hedef girt.
Balefirgeha Mehrabadê hate bombebaran kirin
Di saetên derengiya şevê de, li paytexta Îranê Tehranê, li dijî derdora Balafirgeha Mehrabadê êrîşek pêk hat. Hate ragihandin ku piştî êrîşê teqîneke mezin rû daye û li derdora balafirgehê agir bi derdorê ketiye.
Hat diyarkirin ku hedefa vê êrîşê Balafirgeha Mehrabadê û derdora wê bûye. Piştî teqînê, li herêmê şewateke mezin derket û tîmên agirkujiyê sewqî cihê bûyerê hatin kirin.
Tirs û fikar li bajêr zêde dibe
Têkildarî zirarên canî û madî heta niha daxuyaniyeke fermî nehatiye dayîn, lê hat dîtin ku dûmanên reş ji ser balafirgehê radibin. Ji ber teqînê li navenda Tehranê tirs û fikar di nav gel de çêbû.
Hêjayî gotinê ye ku Balafirgeha Mehrabadê yek ji navendên herî girîng ên geştên hundirîn û operasyonên lojîstîk e.
Balefirgeha Îmam Xumeynî jî bû hedef
Balafirgeha Navneteweyî ya Îmam Xumeynî jî cihek rastî êrişan hatiye. Hate ragihandin ku li nêzî vê balafirgehê jî dengê teqînên mezin hat û piştî teqînan şewat derketiye. Rejîma Îranê piştî teqînan wekî tedbîr geştên hewayî sekinandin.
Li tesîsa Parçîn û Xojir ên teknolojiyê teqîna mezin
Êrişên li ser tesîsên ku kar û barên pêşxistina teknolojiya moşekan û alavên leşkerî dikin jî pêk hatin. Ji van deran yek jî Kompleksa Parçîn a li Tehranê ye. Ev navend bi bernameyên moşekî û teknolojiyên parastina leşkerî tê naskirin. Tê gotin ku xalên stratejîk ên di hundirê vê kompleksê de bûne hedef. Ligel Parçînê tesîsa Xojir di heman astê de moşekan hildiberîne jî bû hede. Çavkaniyên herêmî ragihandin ku di encama êrişan de her du tesîs hatine rewşek ku neyên bikaranîn.
Yekem car S-300 hedef hatin girtin
Rejîma Îranê ku xwediyê pergala parastinê ya S-300 ku ji Rûsyayê girtiye, heta niha parastina hewayî nexistibû meriyetê. Hate ragihandin ku li ser êrişên giran şevê din rejîmê xwest van pergala bixe dewrê. Li gorî çavkaniyan şevê din ev pergalên S-300an ên li Tehran û Karajê hedef hatin girtin.
Li depoyên sotemeniyê ziyanên giran
Ligel hedefên leşkerî û teknolojiyê şevê din gelek depoyên sotemeniyê jî hedef hatin girtin. Li hinek xalên nêzî baregehên leşkerî, depoyên sotemeniyê û santralên elektrîkê yên ku enerjiyê didin navendên leşkerî rastî êrişan hatin. Di encama êrişan de weşat li van deveran derketin. Her wiha ceyrana wargehên li van deran jî wekî encama êrişan hate birîn.
Êriş li Tehran, Karaj û Îslamşehrê hûr bûn
Li gorî çavkaniyan û çapemeniyê êriş bi giranî li ser kembera ewlehiyê ya Tehran, Karaj û Îslamşehrê hûr bûne. Hate diyarkirin ku armanca lêdanê bêtir lawazkirina şiyana moşekî û parastina esmanî ya Îranê bûye.
Serokê îstîxbarata Îranê Xademî hate kuştin
Her Hêzên Parastina Îsraîlê (IDF) ragihand ku Serokê Îstîxbaratê yê Îranê Majîd Xademî di êrişekê de kuştine û gelek berpirsyarên din ên Îranê jî bêbandor kirine. Ev agahî ji hêla çavkaniyên fermî ya Îranê ve jî hate raihandin.
DYA û Îsraîl dixwazin Îran şertan qebûl bike
Li gorî pisporên ewlehiyê sedema girankirina êrişan ew e ku Îran şert û mercên DYAyê ragihandîn qebûl bike. Lê ligel êrişan jî Îranê duh ragihand ku şertên DYAyê gelek giran û dûrî aqilin û dê van şertan qebûl nekin. Ligel vê daxuyaniyê jî deriyê mizakereyan vekirî hate hiştin. Serokê DYAyê Donald Trump jî şevê din cardin daxuyaniyên bi nakokî dan û bi gotina, “Îran nêzîk qebûl kirina şertan e. Ku qebûl neke dê pirên wan, santralên wan ên ceryanê û binesaziya wan tune be”.
Li Sûriyê êriş
Hate ragihandin ku balafirên şer ên Îsraîlê li herêma Seyyide Zeyneb a Şamê û li gundewarên Homsê hinek noqteyên lojîstîk ên girêdayî komên nêzî Îranê kirine hedef.
Derbarê encamên êrişan de agahiyên zelal nehatin girtin.
Êrişên DYAyê li Iraq û Yemenê
Hêzên DYAyê li herêmên bin kontrola komên çekdar ên alîgirên Îranê û Hûsiyan operasyonên “bersivdayînê” pêk anîn. Balafirên DYAyê li herêma Curf al-Sakhar ên dikevin başûrê Bexdayê û li nêzî sînorê Sûriyeyê li bajarê Qaîm li dijî baregehên Ketîbeyên Hizbullahê êrişên esmanî pêk anîn.
Hêzên deryayî û esmanî yên DYAyê bi hevkariya Brîtanyayê, li herêma Hodeyda û paytext Sena, depoyên moşekan û radarên Hûsiyan bombebaran kirin.
