Koçberên ji Serêkaniyê û gundewarên wê diyar kirin ku ji ber dagirkerî, tunebûna ewlehiyê û desteserkirina mal û milkên wan, vegera wan di vê rewşê de nepêkan e. Koçberan xwest ku divê çekdar û biyanî ji malên wan derkevin da ku bikarin vegerin.
Koçberên ku ji ber êrişên dewleta Tirk û komên çete ji warên xwe bûne, têkildarî nîqaşên “vegerê” ji ANAHyê re axivîn. Koçberan destnîşan kir ku mal, erd û gundên wan hîn jî di bin kontrola çekdaran û niştecihên biyanî de ne. Ligel Peymana 29ê Çileyê jî dewleta Tirk û çeteyên girêdayî hêj dawî li dagerkeriyê neanîne û bi vî awayî pêşiya pêkanîna peymanê digirin.
‘Gund hatine wêrankirin û ewlehî nîn e’
Mihemed Wezo ku şêniyê gundê El Rebîatê yê navçeya Zirganê ye, bertek nîqaşî dagirkeriya Tirkiyeyê û çeteyên wê da. Wezo bal kişand ser wêrankariya li herêmê û wiha got: “Hemû berpirsên ku li ser dosyaya vegera koçberan dixebitin, rewşa me dizanin. Gundê me bi temamî hatiye wêrankirin. Di vê rewşê de em çawa vegerin? Ewlehî nîn e û jiyan lê nabe. Em naxwazin bi tena serê xwe û di bin xeteriyê de vegerin; daxwaza me vegereke bi komî, bi rûmet û bi garantiyeke navneteweyî ye.”
‘Bila niştecih û çekdar derkevin’
Jina bi navê Sito ya ji gundê Til Beyderê jî heman fikar anîn ziman û wiha axivî: “Niştecihên ku anîne li wir bi cih kirine hîn di gundê me de ne. Malên me xira kirine. Heta ku ew çekdar û kesên biyanî ji gundê me dernekevin, vegera me negengaz e. Divê rê li ber vegera ewle were vekirin.”
‘Erdên me tên talankirin’
Welatiyê bi navê Sebo Hemê ku ji bajarê Serêkaniyê koçber bûye, bal kişand ser talankirina milkên wan û wiha axivî: “Malên me wêran kirine û dest danîne ser erdên me. Ez naxwazim kesekî ku ne ji wir e di mala min de bijî. Li gundê El Ferîsa 140 donim erdê min heye, lê malbatên çeteyan dest danîne ser û ji bo xwe diçînin. Heya kengî dê ev dagirkerî berdewam bike? Em dixwazin bi rûmet û ewlehî vegerin ser milkên xwe.”
