Riha – Hecî Celal Denîz ku yek ji rûspiyê eşîra Sîpkiyan e li Xelfetiyê tev li pîrozbahiya festîvala rojbûna Rêberê Gelê Kurd Abdullah Ocalan bû. Hecî Celal dilsoziya xwe ya bi Abdullah Ocalan re bi helbestan tîne ziman û ew dibêje ku ew dixwazin êdî Ocalan di nav xwe de bibînin.
Hecî Celal Denîz ku yek ji rûspiyên eşîra Sîpkiyan e û ji navçeya Xelatê ya Bedlîsê hate tev li pîrozbahiya rojbûna 77emîn a Rêberê Gelê Kurd Abdullah Ocalan a li navçeya Xelfetiyê ya Rihayê bû. Tevî temenê xwe yê 78 salî ku li ser gopalê dimeşe jî li qada pîrozbahiyê cihê xwe girt. Ew dilsoziya xwe ya bi Abdullah Ocalan re bi helbestan û nirxandinê tîne ziman.
Hecî Celal hem helbesta li ser Abdullah Ocalan nivîsandiye xwend hem jî derbarê azadiya fizîkî ya Abdullah Ocalan de nêrîna xwe anî ziman.
‘Dinya muhtacî felsefeya wî ye’
Hecî Celal Denîz anî ziman ku ew bi şoreşa ku Rêberê Gelê Kurd Abdullah Ocalan daye destpêkirin şiyar bûne û got: “Xebatên me yên şoreşê didomin. Îro jî ji bo rojbûna Serok Abdullah Ocalan hatime vir. Dinya muhtacî felsefeya wî ye. Însanekî wisa ye ku ji dinyayê re edalet, wekhevî û aramiyê dixwaze. Fikir û rêmanên Serok Abdullah Ocalan cihê tercîhê ye. Ji destpêka mirovahiyê û vir ve kral û pergala dewletan ji xwînê zêdetir tiştek nedane mirovan. Ji bo wê min ji bo Serok Abdullah Ocalan helbest nivîsandiye.”
‘Bila dinyaya wek bihûşt nebe dojeh’
Di berdewamiya axaftina xwe de Hecî Celal destnîşan kir ku ew rojbûna Serokê xwe li tevahiya cîhanê pîroz dike û wiha domand: “Serok bi fikir û raman ve azad e. Divê em ji dewletê nexwazin û nebêjin Serok azad bike. Ya ku ne azad e dewlet bixwe ye. Lê helbet em azadiya fizîkî dixwazin. Dewlet hatiye mehkûmkirin. Bila aqilê xwe bide serê xwe û dinyaya me ya weke bihûştê neke dojeh.”
‘Divê em êdî Serokê xwe azad bibînin’
Hecî Celal dibêje, “Gelî dinya; eger hûn xwedî li Serokatî derbikevin hûn xwedî li xwe derdikevin. Hûn xwedî li Serokatî dernekevin hûn dê di bin zilma çeteyên wek DAIŞê ku mirovan serjêdike de bimînin. Êdî em ne weke berê ne. Ji bo wê em dibêjin; her bijî gerîla û her bijî Serok. Lê divê em êdî Serokê xwe azad bibînin. Teror ne gelê Kurd e, ew kesên ku bêbextiyê li gelê Kurd dikin teror e.”
‘Ji bo hemû gelan li ber xwe dide’
Hecî Celal da zanîn ku Abdullah Ocalan ne tenê ji bo gelê Kurd li ber xwe dide, ji bo hemû gelan, bîr û baweriyan li ber xwe dide. Hecî Celal destnîşan kir ku ev saleke zêdetir e dibêjin Rêberê Gelê Kurd Abdullah Ocalan dê were li Meclisê biaxive, lê ev hê jî ev yek pêk nehatiye û got: “Bes, bila derewan nekin. Bila kesî nexapînin. Bila gavan biavêjin. Divê ji Serok Apo re avahiyeke li vir çêbikin û dinya hemû were serdana wî.”
Helbesta Hecî Celal ku li ser Abdullah Ocalan nivîandiye, wiha ye:
“4ê Nîsanê bûm ji dayik, hatime cîhanê.
Ne ji bo text, pera, qralî, zilm û siltanî.
Roja rojhilat di nava mij û moranê de tarî bibe
Lê vaye roja me derket ji Xelfetiyê.
Ne ji bo Mezopotamyayê, ji bo tevahiya cîhanê.
Weke ronahiya Edîson da tevahiya cîhanê”
