Şandeyek ji rêveberiya YPJê ku bi armanca danûstandinan gihiştibû Şamê bi rayedarên Hikûmeta Demkî ya Sûriyeyê re civiya.
Şandeyek ji rêveberiya Yekîneyên Parastina Jinan (YPJ) bi armanca danûstandinan li Şamê bi rayedarên Hikûmeta Demkî ya Sûriyeyê re civiya. Di şandeyê de ji fermandarên payebilind ên YPJê Rohilat Efrîn û Sozdar Hacî cih digirin. Li gorî agahiyên hatin bi destxistin civîn wekî beşek ji hewildanên ji bo baştirkirina kanalên diyalog û hevrêziya di navbera her du aliyan de pêk tê.
Derbarê rojeva hevdîtinan an asta temsîliyeta hikûmeta Sûriyeyê de agahiyên zelal nehatin girtin.
Çavkaniyê destnîşan kir ku tê payîn nîqaş li ser mijarên têkildarî ragihandin û hevrêziya potansiyel a di navbera aliyan de bin. Her wiha çav li rê ye ku YPJ derbarê hevdîtinên xwe de agahdariyê bike, hûrgulî û encamên civînê eşkere bike.
Ligel hevdîtinan rageşî jî heye
Ev serdan di aliyê têkiliyên di navbera Rêveberiya Xweser û Hikûmeta Şamê de wekî nîşaneyek girîng û erênî tê nirxandin. Lê li gorî çavkaniyan bi boneya statûya YPJê di navbera Rêveberiya Xweser û Hikûmeta Demkî de ragehişek jî heye. Şam di aliyê tevlêbûna YPJê ya di nav artêşa Sûriyeyê de astengiyan derdixe û Rêveberiya Xweser jî vê rewşê wekî xetek sor dibîne.
YPJ dixwaze wekî tûgay cih bigire
Di hevdîtinan de dê şêwazê tevlêbûna YPJê ya di nav artêşa Sûriyeyê de û her wiha berdewamkirina hebûna YPJê bê nirxandin. YPJ israr dike ku di nav artêşa Sûriyê de wekî tûgayekê cih bigire. Hikûmeta Demkî jî heta niha li dijî tevlêbûna jinan a di nav artêşê de derdikeve. Hevîtin di rewşek wiha de pêk tê û ji bo vê yekê wekî nêzîkatiyek erênî tê dîtin. Li gorî nûçeya North Pressê YPJ dê derbarê mijarê de daxuyaniyek berfihe bide.
