Enqere – Hevserokê Giştî yê DEM Partiyê Tuncer Bakirhan ê di bîranîna komkujiya Kizildereyê de axiviye bi lêv kir ku Mazlûm Dogan ji bo çi canê xwe dabe, Mahîr Çayan û rêhevalên wî jî ji bo wê canê xwe dane û got: “Êşa me yek e. Dîvê têkoşîna me jî yek be.”
Bi munasebeta salvegera 54emîn a komkujiya Kizildereyê ku Mahîr Çayan û 10 hevalên wî yên şoreşger hatibûn qetilkirin, li Goristana Karşiyakayê ya Enqereyê bernameya bîranînê hat lidarxistin. Hevserokê Giştî yê DEM Partiyê Tuncer Bakirhan, endam û nûnerên partiyên Sosyalîst û demokratîk û gelek welatî tevlî bernameyê bûn.
Girseyê ji têketina deriyê Goristanê heta Gora Mahîr Çayan û rêhevalên wî meş lidarxist. Girse bi pankarta ku wêneyên Mahîr Çayan, Denîz Gezmîş, Huseyîn Înan, Îbrahîm Kaypakkaya, Ulaş Bardakçi û Yusuf Aslan li ser bû, heta goristanê dirûşmên, “Bijî şoreş û Sosyalîzm”, “Kizildere ne dawî bû, têkoşîn didome” û “Bijî têkoşîna me ya şoreşgerî” berz kirin. Bîranînê bi deqeyekî rêzgirtina ji bo cangoriyên Kizildereyê û Sosyalîzmê dest pê kir.
Piştî rêzgirtinê metna daxuyaniya bîranînê Serokê Federasyona Şoresgerên 78an Huseyîn Esenturk xwend. Huseyîn Esenturk bi lêv kir ku tekoşîna wan didomê û got ku heta serkeftinê ew ê têkoşînê bidomînin.
‘Deriyê me ji hemû Sosyalîstan re vêkirî ye’
Hevserokê DEM Partiyê Tuncer Bakirhan di bîranînê de axivî û bi lêv kir ku Mazlûm Dogan ji bo çi canê xwe dabe Mahîr Çayan û rêhevalên wî jî ji bo wê canê xwe dane û wiha got: “Êşa me yek e. Têkoşîna me jî divê yek be. Tevgera azadiyê ya Kurd û Tevgera Sosyalîst divê bi hev re têbikoşin. Birêz Ocalan dibêje têkoşîna min têkoşîna Mahîr Çayan e. Fikir û rêmanên Mahîr Çayan di nava DEM Partiyê de zindî ye. Dîsa birêz Ocalan dibêje divê Tevgera Azadîyê ya Kurd û Tevgera Sosyalîst bi hev re têbikoşin. Bêyî vê yekê serkêftin ne pêkan e. Deriyê me ji hemû Sosyalîstan re vêkiriye. Wan ji bo piştgiriyê canê xwe dan. Têkoşîna wan tu car ji bîrnakin.”
Bîranîn bi danîna qurnafîlan a ser goran, bi dawî bû.
