Parlamenterê DEM Partiyê yê Îzmîrê Îbrahîm Akin bertek nîşanî pêla binçavkirinên piştî Newrozê da û got: “Heke hûn aştiyê dixwazin, pêşî hurmetê nîşanî çand û nirxên Kurdan bidin.”
Bi pêşengiya Komeleya Alîkarî û Piştevaniya bi Malbatên Girtî û Hikumxwaran re ya Egeyê (EGE-TUHAYDER), ji bo şermezarkirina binçavkirin û girtina gelek welatiyan ku piştî pîrozbahiyên Newrozê li bajarên Tirkiye û Kurdistanê pêk hatin, daxuyaniyeke hat dayîn. Daxuyaniya ku li ber Navenda Çanda Turkan Saylan hat lidarxistin de, dirûşmên “Binçavkirin, girtin û zext nikarin me bêzar bikin”, “Bila zindan werin rûxandin, azadî ji bo girtiyan” û “Girtiyên şoreşger rûmeta me ne” hatin berzkirin. Gelek nûnerên partiyên siyasî, rêxistinên girseyî yên demokratîk û welatî beşdarî daxuyaniyê bûn.
‘Em ê li dijî zextan têkoşîna xwe bidomînin’
Metna daxuyaniyê ji aliyê Hevseroka EGE-TUHAYDERê Ayfer Yildirim ve hat xwendin. Ayfer Yildirim bal kişand ser operasyonên ku li Îzmîrê jî hatine kirin û bi bîr xist ku du jin û zarokek hatine girtin. Yildirim diyar kir ku ew ê li dijî zextan têkoşîna xwe bidomînin.
‘Divê gotin û kirin li hev bikin’
Piştre Parlamenterê Partiya Wekhevî û Demokrasiyê ya Gelan (DEM Partî) yê Îzmîrê Îbrahîm Akin axivî. Îbrahîm Akin destnîşan kir ku Newroza 2026an di dîroka herêmê de Newroza herî bi çoş bû û diyar kir ku binçavkirin û girtinên ku Newrozê wekî hincet nîşan didin, perçeyek ji polîtîkayeke plankirî ne û got: “Heke li vî welatî dixwazin bi gelê Kurd re di nav aştiyê de bijîn, divê pêşî hurmetê nîşanî nirx û çanda Kurdan bidin. Heke hurmetê nîşan nedin, em dixwazin diyar bikin ku ti qiymeta gotinên desthilatdariyê nîne; desthilatdar rastiyê nabêje, derewan dike. Em dixwazin gotin û pratîk li hev bikin.”
Daxuyani bi berzkirina dirûşman bi dawî bû.
