Komîsyona Ziman, Çand û Hunerê ya DEM Partiyê nerazîbûn nîşanî cezakirina stranên Kurdî û kuştina şanoger Bavê Teyar da û got: “Tevî êriş û kuştinan jî em ê xwedî li ziman û çanda xwe derkevin û heta azadiyê li ber xwe bidin.”
Komîsyona Ziman, Çand û Hunerê ya DEM Partiyê bi daxuyaniyek nivîskî bal kişand ser zext û êrişên li ser çand, huner û zimanê Kurdî. Komîsyon di daxuyaniyê de birîna cezayê li hunermendên Kurd û stranên Kurdî û kuştina şanoger Bavê Teyar şermezar kir.
Daxuyaniya DEM Partiyê ya bi sernavê “Tu ceza me ji doza zimanê dayikê venagerîne” hat belavkirin wiha ye:
“Êriş û zext û zordariyên li ser zimanê Kurdî bênavber didomin. Di van rojên dawî de ev êriş bi awayekî sosret tên meşandin. Weke mînak; ji bo hunermend Kasim Taşdogan bi hinceta stranên Kurdî 30 meh ceza, ji bo Hunermend Mazlûm Jînda dîsa bi hinceta stranên Kurdî 22 meh ceza hat birrîn. Polîsan bi awayekî konsanwarî li Amedê êriş bir ser Komeleya Wêjekarên Kurd û dest danîn ser pirtûk û rojnameyan. Akademîsyena Beşa Ziman û Wêjeya Kurdî ya Zanîngeha Mûş Alparslan bi hinceta ku bi xwendekarên xwe pirtûkên Kurdî daye xwendin hat îxrackirin. Lê belê derbarê van pirtûkan de tu qedexe yan jî lêpirsîn tuneye. Herî dawî jî şanoger û lîstikvan Cûma Xelîl Îbrahîm yê ku bi navê Bavê Teyar di hişûbîra gelê Kurd de ciyekî pîroz girtiye ji ber êrişên Tirkiyeyê li Bendava Tişrînê hat kuştin.
Em dizanin ku ev polîtîkayên çandkujî û zimankujiyê sed sal berê hatibûn sîstematîzekirin û îro jî bi awayekî tund ji hêla vê desthilatdariyê ve tên birêvebirin. Lê belê li dijî van polîtîkayên tunekirinê, gelê Kurd, bi daxwaza azadiya çand, ziman û nasnameya xwe têkoşîna xwe bilind kiriye. Îro bi milyonan Kurd ji bo parastin, pêşvebirin û azadiya zimanê Kurdî têdikoşin û li ber xwe didin.
Em ê xwedî li nirxên Kurdewar derkevin
Em jî wek DEM Partiyê em ê li ser bingeha polîtîkayên pirzimanî û pirçandiyê her dem û li her derê têkoşîna xwe ya ji bo zimanê Kurdî û hemû nirxên Kurdewar bilindtir û berfirehtir bikin. Li dijî van biryarên neqanûnî em ê li kêleka hev piştevaniya hev bikin. Tu ceza me ji doza zimanê dayikê venagerîne. Weke Bavê Teyar got ‘Em ji mirinê natirsin’ û em ê ji bo azadiyê têkoşînê xurt bikin.”
