Hêzên Ked û Demokrasiyê yên Çîgliyê, li taxa Guzeltepeyê Newroz pîroz kirin. Di pîrozbahiyê de bang kirin ku ji bo pêşerojeke azad û wekhev divê her kes li dora agirê Newrozê bibe yek.
Hêzên Ked û Demokrasiyê yên Çîgliyê, li Taxa Guzeltepe ya navçeya Çîgliyê bi beşdariya gelek partiyên siyasî, saziyên sivîl û welatiyan Newroz pîroz kirin. Di pîrozbahiyê dirûşmên “Bijî Serok Apo”, “Jin, Jiyan, Azadî” û “Newroz pîroz be!” hatin berzkirin.
‘Têkoşîna jiyana demokratîk mezin dibe’
Li ser navê Hêzên Ked û Demokrasiyê, Rojîn Çetrez axivî û diyar kir ku wan agirê Newrozê di serdemeke Îsraîl û DYAyê herêm kiriye gola xwînê de pêxistiye. Rojîn Çetrez anî ziman ku polîtîkayên şer herî zêde jin, zarok û sivîlan dike armanc û got: “Li herêma me şer gur dibe, li welatê me jî krîzên aborî û civakî kûrtir dibin. Kedkar xizan dibin, karker bi mûçeyên kêm re rûbirû ne û ciwan bêparêzî û bêpêşerojî dimînin. Tevî vê tabloya tarî jî, têkoşîna gelan a ji bo jiyaneke azad, wekhev û demokratîk her ku diçe mezin dibe.”
‘Em dikarin civaka demokratîk bi hev re ava bikin’
Rojîn Çetrez destnîşan kir ku Newroz ne tenê cejneke, lê belê sembola berxwedana li dijî zilmê, serhildana li dijî mêtingeriyê û meşa azadiyê ya li dijî koletiyê ye û got: “Rêya aşitî û demokrasiyê li Tirkiyeyê, di wekheviya gelan û vîna çareseriya demokratîk re derbas dibe. Em dikarin civakeke wisa ava bikin ku karker mafê keda xwe bistînin, jin ji tundiyê rizgar bibin û ciwan bi hêvî li pêşerojê binêrin.”
‘Bila agirê newrozê ji bo aştiyê geş bibe’
Rojîn Çetrez di dawiya axaftina xwe de bang li her kesî kir û got: “Bila agirê Newrozê ji bo aştiyê, ji bo jiyaneke bi rûmet û azadiya jinan geş bibe.
Pîrozbahî bi gerandina govendê û berzkirina sloganan bi dawî bû.
