Wan – Bi sedan kesên li Goristana Hecîbekîr a Taxa Xacortê kom bûn, rojnameger Orhan Karaagar bi bîr anîn. Birayê Orhan, Nizam Karaagar, destnîşan kir ku kesên Orhan kuştin gotin ‘Dê êdî rojname li vî bajarî nayê belavkirin û dê rojnameger li vir nemînin’, lê niha ji 7 salî heta 70 salî li vir in.”
Xebatkarê rojnameya Ozgur Gundemê Orhan Karaagar, di 19ê çileya 1992yan de li Wanê ji hêla hêzên tarî ve hatibû kuştin. Bi minasebeta salvegera kuştina Orhan Karaagar, Komeleya Rojnamegerên Jin a Mezopotamyayê (MKG) û Komeleya Rojnamegeran a Dîcle Firatê (DFG) li ser gora wî ya li Goristana Hecîbekir a li Taxa Xaçortê bernameya bîranînê amade kirin. Nûnerên civakê û gel bi girseyî beşdarî bernameyê bûn. Malbata Karaagar, rêhevalên wî, Hevşaredarê Bajarê Mezin ê Wanê Abdullah Zeydan, hevserokên DBP û DEM Partî, nûnerên saziyên sivîl û gelek kes amade bûn.
‘Kujerên Orhan aşkere bikin’
Ewilî nûnerê DFGê yê Wanê Adnan Bîlen axivî û xêrhatina girseyê kir. Adnan Bîlen, diyar kir ku 32 sal in di ser kuştina Orhan Karaagar re derbas bû, lê hêj jî kesên Orhan Karaagar kuştin nehatine dîtin. Adnan Bîlen, bal kişand ser kuştina Nazim Daştan û Cîhan Bîlgîn jî û wiha got: “32 sal di ser kuştinê re derbas bûn. Lê hêj jî hevalên me tên kuştin. Divê baş bê zanîn ku êdî tu hêz nikarin xwe li ber lehiya çapemeniya azad bigirin. Me li ser nirxên van şehidan xwe mezin kiriye û ti kes nikare dengê me qut bike. Dara çapemeniya azad li ser şitla Gurbetelli Ersoz, Apê Mûsa û hemû şehidên xwe şîn bûye. Îro roja salvegera kuştina rojnamevanê Ermenî Hrant Dînk e jî, heke kujerên Orhan Karaagar hatibana cezakirin, wê Hrant Dînk jî niha di nava me de bûya. Em careke din bang dikin ku bila kujerên Orhan bên dîtin.”
‘Em bi kuştinê xelas nabin’
Dû re li ser navê malbata Karaagar Nizam Karaagar ê piştî 30 salan girtî ma, sala par ji girtigehê derket, bal kişand ser rastiya kurdan û Kurdistanê. Nizam Karaagar, destnîşan kir ku kurd tevî evqas kuştinê jî zêde dibin û wiha got: “Gava Orhan nû hat kuştin, em hatin vir, hejmara me 16-17 kes bûn. Lê niha em bi sedan, hezaran in. Gotin piştî kuştina Orhan êdî rojname li vî bajarî nayê belavkirin, rojnamevan li vir namînin. Lê, binêrin em niha çiqas zêde ne, zarokê 7 salî heta dayika 70 salî li vir in. Em bi kuştinê xelas nabin.”
‘Divê bi destê Abdullah Ocalan ê demokrasiyê bigirin’
Hevseroka DBPê ya Wanê Gonul Ûzûnay jî axivî û hemû şehîdên çapemeniya azad bi bîr anî. Gonul Ûzûnay, destnîşan kir ku çapemeniya azad di hemû şert û mercên xerab de dest ji nivîsandin û belavkirina heqîqetê bernedaye û got: “Çapemeniya azad tevî hemû zext û zoriyan jî heta îro hatiye. Êrîşên li ser çapemeniya azad nebûna demokrasiyê ye û divê destê Birêz Abdullah Ocalan yê aşitî û demokrasiyê bê girtin. Bi awayekî samîmî ev dest bê girtin dê demokrasî bê vî welatî. Em careke din banga xwe ya aşitiyê dubare dikin û li ber hemû şehîdên çapemeniya azad û keda wan bejna xwe ditewînin.”
Bîranîn bi danîna qûrnefîlan a li ser gorê û xwendina duayan bi dawî bû.
