KCKê qurbaniyên komkujiya Helebceyê bi bîr anîn û diyar kir ku gelê Kurd û bi taybetî jî gelê Helebceyê wê vê komkujiyê tu carî ji bîr neke û wiha got: “Gelê me dê têkoşîna xwe ya azadî û wekheviyê bigihîne encamê û hesabê dîrokî ji mejiyê komkujer bipirse.” KCKê bi bîr xist ku ev komkujî li dijî hişyarbûna gelê Kurd a neteweyî pêk hatine lê di encama têkoşîna gelê Kurd de komkujî negihiştine armanca xwe.
Hevserokatiya Konseya Rêveber a Koma Civakên Kurdistanê (KCK) bi boneya salvegera komkujiya Helepçeyê daxuyaniyek nivîskî weşand. Di daxuyaniyê de qurbaniyên komkujiyê hatin bibîranîn û wiha hate gotin: “Gelê Kurd, bi taybetî jî gelê Helebceyê wê vê komkujiyê tu carî ji bîr neke, têkoşîna xwe ya azadî û wekheviyê bigihîne encamê û hesabê dîrokî ji mejiyê komkujer bipirse.”
‘Em qurbaniyan bi rûmet bi bîr tînin’
KCKê bi gotina, “Em di salvegera Komkujiya Helebceyê de ne ku bi êş û hêrseke mezin bi bîr tînin” balkişand ser hestên gelê Kurd û wiha domand: “Komkujiya Helebceyê ku yek ji komkujiyên herî giran ên dîroka mirovahiyê bû û li dijî gelê Kurd hate kirin. Em mirovên di vê komkujiyê de jiyana xwe ji dest dan bi hurmet bi bîr tînin.”
‘Hesab dê bi azadîbûnê bê pirsîn’
Di daxuyaniyê de kujerên komkukjiya Helebceyê yên para xwe ji exlaq, wijdan û mirovahiyê negirtine, mejiyên wan ên qirker bi tundî hate şermezarkirin û ev tişt hatin gotin: “Gelê Kurd di serî de komkujiya Helebceyê dê tu komkujiyan tu carî ji bîr neke, têkoşîna xwe ya ji bo azadî û wekheviyê bibe serî û bi vî rengî hesabê dîrokî ji mejiyê komkujer bipirse.”
‘Komkujî li dijî şiyarbûna gelê Kurd pêk hat’
Di daxuyaniyê de hate ragihandin ku komkujî di demeke ku Têkoşîna Azadiya Kurdistanê bi pêş ve diçû de rejîmên mêtinger ji bo hişyarbûn û rabûna ser xwe ya gelê Kurd asteng bikin, li Helebceyê komkujî pêkanîne. Di daxuyaniyê wiha hate gotin: “Di vê demê de bi heman armancê li parçeyên din ên Kurdistanê jî komkujî hatin kirin. Bêguman di serî de Komkujiya Helebceyê di van komkujiyan hemûyan de gelê me êşeke giran kişand.”
‘Komkujî negihiştin armanca xwe, siyaseta înkarê têk çû’
Di daxuyaniyê bi gotina, “Bi sed hezaran Kurd di van komkujiyan de jiyana xwe ji dest dan, êşên gelekî giran bi serê gelê me de hatin” berdewam kir de ev nirxandin hatin kirin: “Lê belê ev komkujî negihîştin armanca xwe. Gelê Kurd bû xwedî têkoşîna hebûnê û nehişt ku komkujer bigihêjin armanca xwe. Bi komkujiyan hewl hate dayin ku pêşî li hişyarbûna gelê Kurd bê girtin, lê belê encameke berevajî vê yekê derkete holê, gelê Kurd li hemberî komkujiyan bi têkoşînê hişmendî û rêxistiniya neteweyî hîn xurt kir û siyaseta înkarê şikand.”
‘Gelê me berê ji bo hebûnê îro ji bo azadiyê têdikoşe’
KCKê bi bîr xist ku gelê Kurd berê ji bo hebûnê têdikoşiya lê niha hebûn misogerkir û ji bo çareserkirina pirsgirêka azadiyê têdikoşe. Daxuyaniyê wiha dom kir: “Lê belê metirsiya komkujiyê di vê demê de jî heye. Li Şêxmeqsûdê, li Rojava ev xeterî qewimî. Gelê me li çar parçeyên Kurdistanê û derveyî welat rabû serhildanê û komkujiya ku li ser Rojavayê Kurdistanê dihate ferzkirin û dixwest gelê Kurd û gelên din li hemberî hev rake, asteng kir.”
‘Dixwazin heman rêbazê dubare bikin’
Têkildarî êrişên li ser gelê Kurd û talûkeyên heyî jî KCKê da zanîn ku yên berê bi komkujiyan dixwestin hişyarbûna Kurdan asteng bikin îro bi heman rê û rêbazê hewl didin li pêşiya azadiya gelê Kurd bibin asteng û balkişand ser van xalan: “Ji ber vê yekê divê helwesta yekitî û têkoşînê ya ku gelê me ji bo Rojavayê Kurdistanê nîşan da, dewam bike. Rêya pêşîgirtina li komkujiyan yekitiya demokratîk a gelê me û têkoşîna li ser vê bingehê ye.”
‘Em bi têkoşîna hevar hesabê bipirsin’
Di daxuyaniya KCKê de komkujiyên di meha adarê de pêk hatine bi bîr xistin û peyama xwe wiha bi dawî kir: “Her wiha em Komkujiya Beyazitê ya 16’ê Adara 1978’an û 7 xwendekarên pêşeng ên hatin qetilkirin, Komkujiya Qamişloyê ya ku 12’ê Adara 2004’an hate kirin û Komkujiya Gazî ya 12’ê Adara 1995’an bi hurmet bi bîr tînin. Berpirsyarên van komkujiyan hemûyan şermezar dikin û di wê baweriyê de ne ku gelên me wê bi feraseta neteweya demokratîk û stratejiya têkoşîna hevpar hesabê dîrokî ji van komkujiyan teqez bipirsin.”
