Di encama zêdebûna şerê di navbera Hezbollah û artêşa Îsraîlê de, êriş û bombardîmanên hevdem li gelek herêmên Lubnanê berdewam dikin. Rewşa ewlehiyê ya herêmê bi lez giran dibe û hezaran sivîl ji herêmên şer ber bi Sûriyeyê ve koç kirin. Her wiha Beydûr cardin ji hêla Îsraîlê ve hate bombebaran kirin.
Bandora şerê Îran û Îsraîlê li Lubnanê zêde dibe. Bi taybetî piştî daxuyaniya şer a Hizbûllahê Îsraîlê êrişên xwe yên hewayî li başûrê Lubnanê berfireh kirin. Di encama êrişan de li derdora 11 hezar kes, ku piraniya wan penaberên Sûriyeyî ne, ji deriyê Cedîda Yabûs ê li gundewarên Şamê û her weha ji Cosiya ya girêdayî parêzgeha Himsê derbasî Sûriyeyê bûn. Di heman demê de li deriyê El Mesnei yê li ser sînorê Buqaî ya Lubnanê bi sedan erebe ketine pey hevdû û xelk hewl didin ku ji herêmên pevçûnê dûr bikevin.
Artêşa Lubnanê ji hin baregehan vekişiya
Li gorî agahiyên ku ji aliyê Ajansa Ragihandinê ya Fermî ya Lubnanê ve hatine belavkirin, artêşa Lubnanê hinek baregehên xwe yên li ser sînorê Îsraîlê vala kirine û hêzên xwe ber bi cihên din ve kişandine. Berpirsekî ewlehiyê yê Lubnanê ji bo Reuters ragihand ku herî kêm artêş ji 7 baregehên sînorî vekişiya.
Artêşa Îsraîlê bi bejahî kete Lubnanê
Heman çavkanî diyar kir ku hêzên Îsraîlê li hin cihên sînorê ketine hundir û li Girê Hemamis ber bi El Xiyam û Sehila Merceyon ve dest bi operasyonê kiriye. Her wiha topbarana artêşa Îsraîlê li herêmên El Xiyam, Hora û çiyayên nêzî kelha Şeqîf bi demkî berdewam dike.
Îsraîl: Operasyona Zeîr El Esed dest pê kiriye
Berdevkê artêşa Îsraîlê Avichay Adraee berê ragihandibû ku di çarçoveya operasyona ‘Zeîr El Esed’ de dê li başûrê Lubnanê gelek nuqteyên stratejîk bên kontrolkirin, hêzên leşkerî li herêmên bakurê sînorê zêde bikin û xeta parastinê xurt bikin.
Di daxuyaniya artêşê de hate gotin ku ew dixwazin xeteke ewlehiyê çêkin, jêrzemîn û tunelên girêdayî Hizbullah bombebaran bikin û asteng bikin ku şervan ji Lubnanê derbasî xaka Îsraîlê bibin. Wezîrê Parastinê yê Îsraîl Yesraîl Kats jî di daxuyaniyekê de got ku ferman hate dayîn da ku artêşa Îsraîlê ber bi baregehên stratejîk ên nû ve pêş bikeve û Hizbullah berpirsyarê şerê heyî ye.
Beyrûd hate bombebaran kirin, rayedarek Îsrîlê hate kuştin
Artêşa Îsraîlê ragihand ku di êrişekê li Beyrûdê de rayedarê Hizbûllahê Riza Xezayî hatiye kuştin. Li gor daxuyaniya Îsraîlê, Xezayî di nav koordinasyona çalakiyên çekdarî yên di navbera Hizbullah û Îranê de rolek girîng dilîst û ji veguhestina çekan berpirsiyar bû.
He wiha artêşa Îsraîlê îro serê sibê avahiya radyoya El Nûr a girêdayî Hizbullah bombebaran kir. Berdevkê artêşa Îsraîlê şêniyên taxên Hirêk, El Xebîrî û herêmên derdora wan hişyar kir ku ji bo ewlehiya xwe hemû avahiyên ku heta 300 metreyî nêzî navendên Hizbullah in vala bikin.
Koç û metirsiya berfirehbûna şerê herêmî
Koçên girseyî û zêdebûna operasyonên leşkerî nîşan didin ku pevçûn êdî ne tenê li sînorê Lubnanê maye. Li gorî çavkaniyan şer dikare ber bi qonaxeke berfireh a herêmî ve biçe, bi taybetî di demek ku rageşî li gelek deverên Rojhilata Navîn bi awayek hevdem zêde dibe, qeyrana heyî kûr dike.
