Aktivîsta TJAyê Sebahat Tuncel li navçeya Didimê ya Aydinê beşdarî bernameya 8ê Adarê bû û diyar kir ku ji bo rizgariya mirovahiyê û aştiyeke mayînde, modela “Rêya Sêyemîn” û pergala demokratîk yekane çareserî ye.
Rêxistina Partiya Wekhevî û Demokrasiyê ya Gelan (DEM Parti) a navçeya Aydina Didimê û Tevgera Jinên Azad (TJA), di çarçoveya çalakiyên 8ê Adarê Roja Jinên Kedkar a Cîhanî li avahiya navçeyê civîneke jinan pêkanîn. Aktivîsta TJAyê Sebahat Tuncel û gelek jin beşdarî bernameyê bûn. Jinan bi tîlîlî, erbane û stranan pêşwaziya Sabahat Tuncel kirin. Di salonê de pankarta “Em bi berxwedanê jiyaneke azad û wekhev dihûnîn” hat daliqandin û bênavber dirûşmeya “Jin, Jiyan, Azadî” hat berzkirin.
Sebahat Tuncel di axaftina xwe de bal kişand ser şer û pevçûnên li Rojhilata Navîn û girîngiya nêrînên Rêberê Gelê Kurd Abdullah Ocalan û destnîşan kir ku pêşniyarên Birêz Ocalan ne tenê ji bo Kurdan, ji bo hemû gelên herêmê projeyeke jiyanê ye û got: “Em dibînin ku daxwazên gelan ên ji bo azadî û edaletê li hemberî rejîmên zextkar û paşverû her roj zêdetir dibin. Îro li Îranê û li gelek deran jin û ciwan li ber xwe didin. Li aliyekî mudaxaleyên emperyalist, li aliyê din rejîmên faşîst hene. Lê em ne mecbûrî van her du vebijarkan in. ‘rêya sêyemîn’ pêkan e. Ev rê jî jiyaneke demokratîk, ekolojîk û azadîparêziya jinan e. Tenê rejîmeke demokratîk û piralî dikare mirovahiyê rizgar bike.”
‘Em ê pêşerojê li ser bingeha wekheviyê ava bikin’
Sabahat Tuncel anî ziman ku modela li Rojava û parçeyên din ên Kurdistanê tê nîqaşkirin, bingeha “yekîtiya demokratîk” û “biratiya gelan” e û got: “Kurd dixwazin bi nasname û çanda xwe bi awayekî azad bijîn, lê di heman demê de dixwazin bi gelên cîran re jî jiyaneke wekhev û hevwelatiya azad ava bikin.”
‘8ê Adarê roja berxwedanê ye’
Di dawiya axaftina xwe de Sabahat Tuncel bal kişand ser dîroka 8ê Adarê û wiha pê de çû: “8ê Adarê ji ked û berxwedana jinên karkerên tekstîlên yên ku di sala 1857an de hatin şewitandin tê. Lewma ev roj ji bo me ne tenê şahî ye, roja têkoşînê ye. Em li dijî her cûre tundî, tacîz û mêtingeriya li ser ked û bedena jinan dengê xwe bilind dikin. Ji bo ku em careke din wan neêşin, divê em tora xwe ya têkoşînê xurtir bikin.”
Civîn bi dirûşmeyên “Jin, Jiyan, Azadî” bi dawî bû.
