Di demekê ku êrîşên Îsraîl û Amerîkayê li ser Îranê dest pê kirin, Encumena Neteweyî ya Berxwedana Îranê (NCRI) projeyeke nû ya 10 xalî ji bo siberoja Îranê ragihand. Di navenda vê projeyê de, ji bo Kurdan daxwaza statuyeke taybet tê kirin.
Seroka hilbijartî ya NCRIyê, Meryem Recevî, bang li gelên Îranê kir ku ji bo sîstemeke demokratîk û laîk li ber xwe bidin. Recevî destnîşan kir ku di Îrana nû de, divê dawî li zilm û zora li ser gelên bindest, bê anîn.
Ji bo Rojhilat Otonomî
Di plana ku ji aliyê baskê hukûmeta demkî ya NCRIyê ve hatiye parvekirin de, xala herî girîng a ku Kurdan eleqedar dike xala 7emîn e. Li gorî vê planê, NCRI soz dide ku ji bo Kurdistana Îranê planeke taybet a otonomiyê bixe meriyetê. Tê diyarkirin ku divê dawî li neheqiya li dijî hemû neteweyên li Îranê bê anîn.
Hilweşandina sîstema meleyan û avakirina komara laîk
Herwiha sîstema serdestiya olî bi temamî tê redkirin û li şûna wê komareke li ser bingeha pirdengiyê tê pêşniyazkirin. Azadiya raman, çapemenî, partiyên siyasî û înternetê wekî şertê sereke tê dîtin. Divê saziyên mîna Pasdaran Hêza Quds û Besîc demildest bên belavkirin. Di Îrana nû de dê ol û karên dewletê ji hev bên veqetandin û azadiya baweriyê dê bibe garantiya qanûnî.
Wekheviya jin û mêr
Di planê de cihêrengiyeke mezin didin mafên jinan. Di xala 5emîn de tê gotin ku dê di her qada jiyanê de wekheviya jin û mêr an hebe. Jin dê di serkêşiya siyasî de wekhev bin û qanûnên bi navê îffet û lixwekirina bi zorê dê bên rakirin.
Her wiha, mûxalîf soz didin ku, cezayê darvekirinê dê bê rakirin. Îşkence dê bi temamî bê qedexekirin. Dadgehên Şoreşê dê bên girtin û sîstemeke dadwerî ya serbixwe li gorî pîwerên navneteweyî bê avakirin.
Îraneke bê çekên nukleerî
Di dawiya planê de NCRI balê dikişîne ser pêwendiyên navneteweyî. Mûxalîf dixwazin Îranekê ava bikin ku ji çekên nukleerî û çekên kîmyewî paqijkirî be. Armanc ew e ku Îran bi civaka navneteweyî re di nava aştiyê de be û çavkaniyên welat ji bo aboriyeke azad û parastina jîngehê bên bikaranîn.
