62 malbatên ku li Kampa El Erîşa bûn, di çarçoveya bernameya vegera xwebexş de ku ji aliyê Rêveberiya Xweseriya Demokratîk ve hatiye destpêkirin, ji kampê derketin û berê xwe dan Dêrazorê.
Derketina kampan a penaberan didome. Di çarçoveya bernameya ji bo hêsankirina vegera xwebexş a koçberan de ku ji aliyê Rêveberiya Xweseriya Demokratîk a Bakur û Rojhilatê Sûriyê bi hevkariya Nûnertiya Komîseriya Bilind a Penaberan a Neteweyên Yekbûyî (UNHCR) pêk tê, komeke din a koçberan di 3ê Hezîranê de ji kampa El Erîşa ya li başûrê bajarê Hesekê derket û derbasî Dêrazorê bûn.
Di 6 mehan de 11 kom derketin
Rêveberiya kampê destnîşan kir ku koma ji 62 malbatan (311 kes) pêk tê ji kampê derketin û derbasî Dêrazorê bûn. Ji destpka sala 2025an heta niha 11 kom ji kampê derketin. Rêveberiya kampê diyar kir ku veger bi dilxwazî pêk tê, ji bo vegerê jî kar û barên fermî têne temamkirin û ji bo vegera ewle jî alavên veguhastinê têne peydakirin. Di çend mehên borî de gelek malbatên ji Hums, Şam, Hema û Idlibê ji kampê derketibûn. Li kampê hîna jî nêzîkî 11 hezar koçber dijîn, piranîya wan ji deverên rojhilatê Sûrîyeyê ne ku ji ber şerê li dijî çeteyên DAIŞ`ê yan jî ji ber şert û mercên ewlehî û mirovî koçber bûne.
