Şirnex – Berdevka DEM Partî Ayşegul Dogan di pîrozbahiya Newroza Qilebanê de balkişand ser banga Rêberê Gelê Kurd Abdullah Ocalan û got: “Çend meh berê şer hebû. Lê Rêzdar Abdullah Ocalan di bin şert û mercên giran a tecride de deriyekî nû vêkir.”
Li Bakurê Kurdistanê û Tirkiyeyê Newroz îsal bi dirûşmeya, “Rêbertiya Azad Civaka Demokratîk” 89 navendan tê pîroz kirin. Di çerçoveya pîrozbahiya Newrozê de li navçeya Qileban a Şirnexê jî Newroz bi girseyî pîroz kirin. Newroza ku li qada şahiyê ya navçeyê hat pîroz kirin, girseyeke mezin beşdar bû. Welatî bi cil û bergên Kurdî tevlî Newrozê bûn û li qada Newrozê govend gerandin. Berdevka Partiya Wekhevî û Demokrasiyê ya Gelan (DEM Partî) Aysegul Dogan û hunermend Îmad Rekanî tevlî Newrozê bûn.
Welatiyên Qilebanê bi nêz bûna seata Newrozê vê bi cil û bergên Kurdî herikîn qadê û li qadê govend gerandin. Girseyê dirûşmeyên, “Newroz pîroz be” Newroz pîroz kirin. Pîrozbahiya Newrozê ji bo kesên di rêya demokrasî û azadiyê de jiyana xwe ji dest danê bi deqîqeyekê rêz girtinê destpêkir. Piştî rêzgirtinê Hevserokê DEM Partî ya navçeya Qilebanê Abdullah Gun axivî. Abdullah Gun bal kişand ser banga Rêberê Gelê Kurd Abdullah Ocalan û got ku di masaya ku Abdullah Ocalan li ser rûniştiye de tu gel winda nake.
‘Rêzdar Abdullah Ocalan deriyek vêkir’
Piştre jî Berdevka DEM Partî Ayşegul Dogan bi pîrozkirina Newrozê dest bi axaftina xwe kir û got: “Newroz mizginiya aştiyeke mayinde ye. Newroz li hemû gelan pîroz be. Em di serî de Newrozê li gelê xwe yê gelek berdêl dane pîroz dikin. Ked, têkoşîn û doza me ji bo jiyaneke azad e. Em dixwazin bi hemû gelên cûda re di nav xwezaya xwe de bijîn. Peviste em di vê qonaxa ku em gihanê de barê rêzdar Ocalan hilgirin. Em hemû gelên Rojhilata Navîn di nav taritiyeke mezin de bûn. Çend meh berê şer hebû. Hevî nema bû. Dema ku hevî qediyan di bin şert û mercên giran de Rêzdar Ocalan di bin şert û mercên giran a tecridê de deriyek vêkir. Berpirsyariyek hilgirt. Lewma em Newroz Newroza xwedî derketina ye. Em li vir Newroza Rêzdar Abdullah Ocalan jî pîroz dikin.”
‘Bi Civaka Demokratîk hemû gel wê bi serbikevin’
Aysegul Dogan di berdewama axaftina xwe de tekildarî pêvajoya hatiyê destpêkirin jî ev tişt anîn ziman: “Nexşereya me gel e. Li pêş deriyan tu masa tune ye. Tiştekî ku em ji we vedişêrîn tune ye. Rêya Rêzdar Abdullah Ocalan 30 sal in dixwast niha vedike. Niha jî em di destpêka dîrokeke nû de ne. Em ê vê rûpelê bi hev re binivisînin. Hûn ê binivisînin. Ji xwe bawer bin. Em wekheviyê dixwazin. Li hevhatin di navbera kesên ku di navbera wan de şer heye de çêdibe. Lê aştî tiştekî civakî ye. Gel ji bo aştiyê amade ye. Heta niha me her tişt bi ked û têkoşînê bi destxistiye. Me ziman û nasnameya kesî înkar nekiriye. Di vê qonaxa nû de bi hevre girtineke mezin çêbikin. Ewilî em ê tîfaqa navxweyî çêbikin. Kesên ku gumana wan zêde ye, em ê îkna bikin. Em dibêjin ew pêvajoya destpêkiriye ji bo bigeheje encamê divê em xwedî derbikevin. Heke em lawaz bin û xwedî dernekevin ew derfet wê ji destê me biçe. Ji ber wê yekê li kada xwe xwedî derbikevin. Nirx û rûmeta xwe xwedî derbikevin. Asta ku em gihanê asta serkêftinê ye. Bi Civaka Demokratîk hemû gel wê bi serbikevin. Heviya me azadiya hemû girtiyan û civaka demokratik û wekhev e. Em tenê hevî nakin û dibêjin bi bîr û baweriya cejna vê Newroza dîrokî vî barî bi hev re hilgirin. Em dizanin tu hêz ji heza gelan ne mezintir e. Bi hêza wê û xwedî derketina wê aştî pêk tê.”
Piştî axaftina Aysegul Dogan girseya li qadê bi yek dengî dirûşmeya, “Bijî Serok Apo” berzkirin. Girseyê li qadê agirê Newrozê bi dirûşmeyên, “Bijî Serok Apo” û çêpikan geş kirin. Girsê li derdora govenda Newroz gerand û Newroz pîroz kirin. Piştre jî hunermend Îmad Rekanî derket dikê û stran gotin. Newroz bi stran û govendê bi dawî bû.
