Xizmên Windayan û Şaxên ÎHDê yên Amed û Êlihê bi boneya winda bêne dîtin û kujer bêne darizandin, li Amed û Êlihê çalakiyên xwe yên heftane berdewam kirin. Xizmên windayan çîrokên windayan xwendin û xwestin komîsyon vê heqîqetê ronî bike.
Xizmên windayan û parazvanên mafên mirovan ji bo winda bêne dîtin û kujer bêne darizandin, li Parka Koşuyolu û Kolana Gulistanê daxuyanî dan.
Amed
Xizmên Windayan û Şaxa ÎHDê ya Amedê di hefteya 863an de aqubeta Mehmet Salîm Acar pirsîn. Kurê Mehmet Salîm Acar, Îhsan Acar di çalakiyê de got: “31 salên bavê min e winda ye. Ev 31 sal in gavbi gav li şopa bavê xwe me.”
Xizmên Windayan û Şaxa Komeleya Mafên Mirovan (ÎHD) a Amedê di hefteya 863yemîn de aqubeta Mehmet Salîm Acar ê kû di 20ê Tebaxa 1994an de li Navçeya Bismil a Amedê ji alîyê kesên xwe wekî polis dan naskirin ve hat binçavkirin û piştre hat windakirin pirsîn.
Xizmên windayan û Komeleya Mafên Mirovan a Amedê (ÎHD) di hefteya 863yan de çalakîya xwe li pêş Abîdeya Mafê Jîyanê ya Parqa Koşuyolu ya Amedê daxuyanî dan. Di çalakîyê de endam û rêveberên Şaxa ÎHDê û Xizmên Windayan wêneyên xizmên xwe rakirin û bal kişandin ser kesên hatine windakirin. Xizmên windayan vê hefteyê aqûbeta Mehmet Salîm Acar pirsin. Kurê Mehmet Salîm Acar Îhsan Acar çîroka bavê xwe vegot. Îhsan Acar bal kişand ser windakirina bavê xwe û wiha got: “Dema bavê min ji alîyê dewletê ve hate windakirin 31 salî bu. Îro 31 sal in winda ye. Ev 31 sal in gav bi gav ez li şopa bavê xwe me. Em jî wek Dayikên Şemiyê yên li Qada Galatasarayê 30 sal in li vir têdikoşin. Ev tekoşîn a me tekoşîna rastî û heqîqetê ye. Ev mirovên ku hatin windakirin mirovên bêsûc bûn. Ji mal û cîhên xwe hatin girtin û windakirin. Îro li Meclisa Mezin a Tirkiyeyê komîsyonek hatiye avakirin. Divê dewlet pêşî ji paşeroja xwe de dest pê bike û van rastîyan derxîne holê. Du roj berê dayîkên me di Komîsyonê de xwastin bi kurdî xwe îfade bikin, lê nehîştin bi kurdî bi axivin. Em ji komîsyonê dixwazin ku tercûmana daynîn wir û daxwazên dayikan bi zimanê wan guhdar bikin. Em êdî samimîyetê dixwazin. Êdî axaftin qedîyaye û dema pratîkê ye. Pratîk jî di heqîqeta wan mirovên me ên hatine windakirin de veşartî ye.”
Êlih
Şaxa ÎHDê ya Êlihê û xizmên windayan jî di hefteya 699emîn a çalakiya xwe de li ber Abîdeya Mafên Mirovan a li Kolana Gulistanê kom bûn. Di çalakiya ku pankarta bi nivîsa “Bila winda bên dîtin, kiryar bên darizandin” vekirin. Tevî parêzvanên mafên mirovan, gelek kes beşdar bûn.
Di çalakiya vê hefteyê de çîroka Alî Gunduz hat xwendin ku ji 22’yê Tebaxa 1998’an ve gava ji gundê Helanê yê navçeya Kercews a Êlihê hat navenda Êlihê, tu agahî jê nehatine girtin. Çîroka ku bi devê kurê Gunduz ve ji hêla Hevseroka Şaxa ÎHD’ê Melek Atalayê ve hat xwendin wiha ye: “Di 22’yê Tebaxa 1998’an de, gava bavê min li nav baxçeyê li gund dixebitî, xortekî nêzî 18 salî nêzîkî wî bû. Wî jê re got ku pirsgirêkek xizmekî wî heye û ew dixwaze çareser bike. Ew bi hev re li otomobîlekê siwar bûn û ber bi Êlihê ve çûn. Li Êlihê, ew çûn mala Mustafa Kaya. Piştî ku li wir diaxivin, ew bi Mustafa Kaya û kurê wî Fatih Kaya re bi otomobîla Mustafa Kaya diçin. Nayê zanîn çûne ku derê. Ji wê rojê ve ji Mustafa Kaya, Fatih Kaya û Alî Gunduz tu agahî nehatiye girtin. Dema bavê min nehat malê, me xeber li her derê belav kir. Kesî ew nedîtibû. Em giriyan. Paşê, min gilî li dozgeriya Qoserê ku ez lê dimam, kir. Ji lêpirsîna dozgeriyê tu encam derneket. Her wiha ji kesên ku bi bavê min re winda bûne jî tu xeber tune. Windabûna ji nişka ve ya sê kesan û rastiya ku heta roja îro ji yekî ji wan jî tu xeber nehatiye wergirtin, cihê fikarê ye.”
Melek Atalayê diyar kir ku ew ê li ser aqûbeta welatiyên winda bisekin û got ku divê berpirsiyar demildest werin eşkerekirin û radestî edaletê werin kirin.
Daxuyanî bi çalakiya rûniştinê bi dawî bû.
