Amed – Endama Komelaya Berî Her Tiştî Zarok Hîvran Tîmûr ji bo 20ê Mijdarê Roja Mafên Zarokan a Cîhanê wiha got: “Em di hemû xebatên xwe de bingeha xwe li ser parastina mafên zarokan diafirînin”
Ji sala 1954an vir ve, her 20ê Mijdarê wek Roja Mafên Zarokan ya Cîhanê tê pîrozkirin. 20ê Mijdarê di heman demê de salvegera ragihandina mafên zarokan a ku di 1959an de hate weşandin û peymana mafên zarokan a ku di 1989an de li Civata Giştî ya Neteweyên Yekbûyî (NY) hate pejirandin. Endama Komeleya Berî Her Tiştî Zarok Hîvran Tîmûr derbarê 20ê Mijdarê û xebatên komeleyê yên ji bo zarokan de axivî.
‘Zarok di temenê biçûk de tên zewicandin’
Hîvran Tîmûr diyar kir ku bi salane li Kurdistanê şer didome û li gel şerê çekdarî şerê taybet jî tê meşandin. Hîvran Tîmûr bal kişand ser bandora şerê taybet a ku li ser zarokan dike û wiha got: “Welatên mîna welatê me bi salane şer lê didome ji bilî şer polîtîkayên şerên taybet ên dewletê lê didome. Her wiha li gel pirsgirêka xizaniyê wekî din jî pirsgirêkên zarokan hene. Zarokên karker li welatê me pirr in. Zarok di temenê biçûk de tên zewicandin. Ev zewac bi darê zorê tê kirin. Di çarçoveya van pirsgirêkan de 20ê Mijdarê Roja Mafên Zarokan girîng e. Bi her awayî parastina mafên zarokan ji bo me girîng û watedar e. Em jî wek Komeleya Berî Her Tiştî Zarok ku ji 2017an vir ve ava bûye, hemû xebatên me li ser bingeha parastina mafên zarokan e.”
‘Em hemû xebatên xwe bi zimanê zikmakî dimeşînin’
Hîvran Tîmûr derheqê xebatên ku ji bo zarokan dimeşînin jî parve kir û wiha axivî: “Em ji bo zarokan gelek kargehan û xebatan li dar dixin. Bi taybetî jî li herêmên erdhejê li Semsûrê me ji bo zarokan gelek çalakî li dar xistin. Kargehên şanoyê û muzîkê ji bo zarokan çêdikin. Em xebatên ji bo zarokan bi Şanoya Bajêr a Amedê, Zarok Mayê û Zarok TV re bi rê ve dibin. Em hemû xebatên xwe bi zimanê dayikê bi Kurdî dikin. Em dixwazin bi zarokan re hişmendiyekî wisa ava bikin ku mafên wan hene. Zarokên Kurd ji mafê xwe yê perwerdehiya bi zimanê zikmakî bêpar man e. Xebatên me perwerdehiyek alternatîf e. Niha jî em li gundên navçeya Çinarê xebatên zarokan dikin. Em li ser mafên zarokan û li dijî zewicandina bi temenê biçûk disekinin. Em li dijî vê yekê dixwazin hişmendiyekî ava bikin.”
‘Dewlet bi salane li Sûrê xebatên qirêj dimeşîne’
Hîvran Tîmûr anî ziman ku wan komeleya xwe li Sûrê vekirine û ji bo zarokên Sûrê deriyê wan her dem vekirî ye. Hîvran Tîmûr bal kişand ser komeleyên ku bi destê dewletê hatine avakirin û got: “Li Sûrê bi destê dewletê li ser zarokan polîtîkayên qirêj tên meşandin. Heya niha em ne li Sûrê bûn, ji niha şûn ve em dixwazin xwe bibihînin zarokên navçeyên wek Sûrê û Rêzanê. Em dixwazin li ber polîtîkayên qirêj rabin. Deh sal berê dewletê şerekî giran li vir meşandibû û gelek tax hatibûn xerakirin. Ev şer li ser jiyana zarokan bandorek neyînî kiribû. Em dixwazin van polîtîkayên dewletê bê bandor bikin. Êdî zarokên me ne bi tenê ne li Sûrê saziyek û malek wan heye. Tenê ne ji bo zarokan her wiha ji bo jinên li Sûrê jî em dixebitin. Em bi hev re dikarin xwe xurttir bikin.”
‘Di pêvajoyê de divê li zarokan were guhdarîkirin’
Hîvran Tîmûr di çarçoveya pêvajoya Aştî û Civaka Demokratîk de bal kişand ser girîngiya mafên zarokan û destnîşan kir ku wan di çarçoveya pêvajoyê de li zarokan û xwestekên wan guhdar kiriye û got: “Hê jî li welatê me metirsiya şer heye. Her çiqas em di nav pêvajoyekê de bin jî lê hê jî metirsiya jin û zarokan heye. Di pêvajoyên wiha de herî hindik li daxwaz û fikra zarok û jinan tê guhdarîkirin. Divê em di pêvajoyek wiha girîng de bêtir li jin û zarokên mexdûr guhdar bikin. Divê her kes guh bide daxwazên zarokan û mafên zarokan piştguh neke û bi baldarî nêz bibin. Parastina mafên zarokan bi her awayî pirr girîng e û li li welatê me hin bêtir girîngtir e.”
