Bavê Rojîn Kabaîş Nîzamettîn Kabaîş çû serdana karkerên veguherîna bermahiyan. Di serdanê de Serokê Komeleya Karkerên Veguherîna Bermahiyan Alî Mendîllîoglû diyar kir ku herkesên ku hatine windakirin wekî zarokên wan in.
Rojîn Kabaîş a 21 salî dema li Zaningeha Yuzuncuyilê ya Wanê dixwend di 27ê Îlona 2024an de winda bibû û cenazeyê wê di 15ê Cotmeha 2024an de li herêma Mollaqasimê ya navçeya Tûşbayê ya Wanê hatibû dîtin. Ji wê rojê ve ji bo kujerên Rojîn Kabaîş werin dîtin û darizandin bavê wê Nîzametîn Kabaîş di nava têkoşînekê de ye. Nîzamettîn Kabaîş li Stenbolê çû serdana karkerên veguherîna bermahiyan.
‘Ji bo hesap bipirsin em li ser piyan in’
Di serdanê de ewilî Serokê Komeleya Karkerên Veguherîna Bermahiyan Alî Mendîllîoglû axivî. Alî Mendîllîoglû diyar kir ku ew ji kujerên Rojîn Kabaîş, Gulistan Dokû, Rojwelat Kizmaz û hezaran kesên ku wekî wan hesab bipirsin li ser piyan in û wiha axivî: “Li Rojhilata Navîn ziman û çanda me tê qedexekirin ji bo wê jî em li ser piyan in. Divê em qîmeta rojekî bizanin û em ê layiqî wê rojê bin. Herkesên ku hatine windakirin wekî zarokan me ne. Nîzamettîn Kabaîş gotibû ‘Ji ber em xîzanin kujer nayên dîtin’ ev gotin herdem di aqlê me de ye. Lê em ne bêhez in. Em bibin yek ew nikarin tu tiştî bikin.”
‘Hûn bûn dengê Rojîn û Gulistan’
Nîzamettîn Kabaîş jî anî ziman ku ew nêzî du sal e vê êşê dikişînin û ev tişt got: “We em tenê nehiştin û hûn bûn dengê Rojîn û Gulistan. Hûn li gel malbatan sekinîn.”
Piştî axaftinan ji bo Rojîn Kabaîş quran hate xwendin.
