11emîn Festîvala Şanoyê ya Navneteweyî ya Amedê ku îsal bi temaya “Diyalog ji bo aştiyê” bi beşdariya komên şanoyê yên ji 17 welatan hatine tê lidarxistin, bi resepsiyonê dest pê kir.
11emîn Festîvala Şanoyê ya Navneteweyî ya Amedê ku di navbera 22yê Nîsanê û 2yê Gulanê de bi dirûşma “Diyalog ji bo aştiyê” ji aliyê Şaredariya Bajarê Mezin a Amedê ve tê lidarxistin, bi bernameya vekirinê dest pê kir. Festîvala ku di bin koordînasyona Şanoya Bajêr a Şaredariya Bajarê Mezin a Amedê de tê lidarxistin, tê de bi giştî 22 lîstik dê bên pêşandan. Dema ku piraniya pêşandanên lîstikan li Navenda Çand û Kongreyê ya Çand Amedê bên kirin, hin performans jî li qadên vekirî dê derkevin pêşberî temaşevanan. Bernameya festîvalê dê ne tenê bi qonaxan re sînordar bimîne. Çalakiyên ku bi gotûbêj, panel, atolye û hevdîtinên hunermendan dewlemend bûne, dê bi anîna cem hev a qadên cuda yên şanoyê, atmosfereke zindî ya çand û hunerê bide bajêr. Ji gelek welatan şanoger, stranbêj û temaşevan, hevşaredarên Navend û navçeyên Amedê, endam û nunerên saziyên sivîl û gelek kes tevlî bernameyê bûn. Di bernameyê de mêvanan bi cil û bergên neteweyî û rengîntir peyamên aştî û hevgirtinê dan.
Bername bi derketina Koma Govendê û dengbêjan bi dawî bu. Festîval dê sibê bi lîstika ‘Moraşîn’ li Çand Amedê berdewam bike.
‘Şano naqîre û aşkere dike, ferz nake û wedixwîne’
Seroka Enstîtuya Şanoyê ya Navneteweyî (ITI) yê Jessica Kaahwa da zanîn ku dem ne dema vekişînê ye, dem dema wêrekiyê ye û wiha axivî: “Werin em şanoyek biafirînin ku wijdana bêxemiyê têk bibe û empatiyê ji nû ve ava bike. Em şanoyê ne tenê wek şahiyê lê wekî hêzek ji bo girêdana mirovan û ramanên civakî ji nû ve piştrast bikin. Şano yek ji wan cihên mayî ye ku li derveyê siyaset, propagandayê ye û li derveyî tirsê bi hev re hevdîtinekê pêk tîne. Ew naqîre û aşkere dike, ferz nake û wedixwîne. Divê şano bersiv bide. Şano rûyê mirovan ji bo krîzên cîhanî vedigerîne. Ew israr dike ku her çîrok girîng e. Ew rastiyên dûr tîne holê û windabûyîna mirovahiyê red dike.”
‘Şanoya Kurdî xwedî tecrûbe, rol û mîsyon e’
Hevşaredara Bajarê Mezin a Amedê Serra Bucak di axaftina vekirina bernameyê de da zanîn ku ew ê bi festîvala şanoyê bibin dengê aştî û diyalogê û got: “Mêvanên ezîz bi hatina we em gelek kêfxweşbune. Îşev em dixwazin vekirina festivala xwe bi hevre bikin. bi rastî şanoya Kurdî, dîroka şanoya Kurdî ji bo çar parçeyên Kurdistanê gelek girîng e. Şanoya Kurdî xwedî tecrûbe, rol û mîsyon e. Ev rol û misyon îro li Amedê tê avakirin. Aştî ne bi bêdengiyê wê bi axaftina zimanan were.”
‘Dê dengê aştiyê li navçeya Sûrê bilind bibe’
Hevşaredarê Bajarê Mezin ê Amedê Dogan Hatun anî ziman ku bi festîvala şanoyê dê dengê aştî û xwişk-biratiyê xurttir bibe û wiha got: “Yên ku ji derve hatine bajarê me bi ser seran ser çavan hatine. Ev festivala şanoyê dê bibe dengê aştî û diyalogê. Hunermend hemû keda xwe ji bo şano û ji bo aştiyê dimeşînin. Dê dengê aştiyê li navçeya Sûrê bilind bibe.”
Bername bi Koma Govendê û dengbêjan bi dawî bû. Festîval dê sibê bi lîstika ‘Moraşîn’ li Çand Amedê saet 20:30an berdewam bike.
