Komîteya Parastina ‘Mafê Hêviyê’ û Hevdîtina bi Abdullah Ocalan re ya Navneteweyî xwest, tecrîda li ser Rêberê Gelê Kurd Abdullah Ocalan bi tevahî rabe û ji bo bicihanîna ‘Mafê Hêviyê’ dest bi kampanyayeke îmzeyan a navneteweyî kir.
Komîteya Parastina ‘Mafê Hêviyê’ û Hevdîtina bi Abdullah Ocalan re ya Navneteweyî ji bo ku Rêberê Gelê Kurd Abdullah Ocalan demildest serbest bê berdan qampanyaya îmzeyan a navneteweyî da destpêkirin. Kampanya ku ji welatên cuda gelek siyasetmedar, akademîsyen, rewşenbîr û hunermend tevlî bûn, di demeke kurt de gihîşt zêdeyî 500 îmzeyan. Komîteyê bi vê piştgiriya xurt daxwazên xwe gihandin sazî û raya giştî ya navneteweyî.
Îmalî tê wateya ji holêkirina derfeta guherîn, diyalog û hêviyê
Komîteyê derbarê kampanyayê de daxuyaniyek weşand. Di daxuyaniyê de hate gotin ku di demek li cîhanê şer, zext û rewşa nediyar heye, bêdengî wê bê wateya hevkariya bêedaletiyê. Komîteyê bi bîr xist ku Abdullah Ocalan ji 15ê Sibata 1999an û vir ve li Îmraliyê tê ragirtin û ev rewş tenê rewşeke ragirtinê nîne. Di daxuyaniyê de hate destnîşankirin ku ev yek tê wateya jiholêrakirina derfetê guherîn, diyalog û hêviyê ya bi rêk û pêk. Komîteyê anî ziman ku Îmrali êdî ne tenê girtîgehek e, ew bûye sembola desteserkirina ‘mafê hêviyê.
‘Tu dewlet nikarin mirovekê ji hêviya azadiyê bêpar bihêlin’
Komîteyê işaret bi biryarên Dadgeha Mafên Mirovan a Ewropayê û mekanîzmayên mafên mirovan ên navneteweyî kir û diyar kir ku ‘mafê hêviyê’ mafekî gerdûnî ye. Di daxuyaniyê de hate gotin ku tu dewlet nikarin mirovekî ji hêviya azadiyê, ji derfetê jinûve nirxandina çarenûs û diyalogê bêpar bihêlin.
‘Divê gavên şênber bên avêtin’
Komîteyê daxwazên xwe bi van sê sernavan anî ziman: “Divê tecrîda li ser Rêber Apo demildest bê rakirin, şert û merc bêne afirandin ku karibe bi malbatê, parêzeran û heyetên navneteweyî re hevdîtinê bike. Ji bo aştî û jiyana hevpar a li herêmê pêvajoya diyalogê ya wekhev û mayinde bê destpêkirin. Saziyên navneteweyî dawî li bêdengiya xwe bînin û gavên şênber û bi biryar biavêjin” Ev gav ne tenê gavek hiqûqî ye, di heman demê de pêwîstiyeke dîrokî û siyasî ye.
‘Dawîkirina tecrîdê ji bo çareseriyê girîng e’
Komîteyê diyar kir ku bidawîkirina tecrîda li Îmraliyê ji bo şikandina tundiyê û ji nûve avakirina baweriya di navbera gelan de gelekî krîtîk e û ragihand ku hevdîtina bi Abdullah Ocalan re ji bo siyaset ji nûve derbasî ser zemîna diyalogê bibe û pênaseya ‘hêviyê’ bibe xwedî wateya dîrokî gigrîng e.
Komîteyê ragihand ku ev banga bi kampanya îmzeyan xurt bû wê pêşkêşî Yekîtiya Ewropa, Neteweyên Yekbûyî û saziyên pêwendîdar ên navneteweyî bê kirin.
Kampanya îmzeyan li ser vê navnîşanê dewam dike: https://www.change.org/p/support-visit-and-freedom-for-abdullah-%C3%B6calan-realization-of-the-right-of-hope?utm_medium=custom_url&utm_source=share_petition&recruited_by_id=f87143f0-a099-0130-edd3-3c764e04dd47
