Xizmên Windayan û Şaxa ÎHDê ya Amedê di hefteya 883yemîn de çalakiya xwe berdewam kir û li aqûbeta Omer Oner û Nûrî Dayan pirsîn. Di çalakiyê de xwestin ku kujerên Omer Oner û Nûrî Dayan bên eşkerekirin.
Xizmên Windayan û Komeleya Mafê Mirovan (ÎHD) a Şaxa Amedê çalakiya “Bila winda bên dîtin û faîl bên darizandin” di hefteya 883yemîn de berdewam kir. Çalakî li ber Bîrdariya Mafên Mirovan a li Parka Koşuyolu pêk hat. Rêveberên ÎHDê, Xizmên Windayan û gelek kes tev li çalakiyê bûn û wêneyên windayan hildan.
Vê hefteyê çîroka Omer Oner û Nurî Dayan ku di sala 1994an de li gundê Axtepê yê bi ser navçeya Çinara Amedê hatin revandin û windakirin, hate xwendin.
‘Bila kûjerên hevjînê min bên eşkerekirin’
Di çalakiyê de pêşî hevjîna Omer Oner, Nezîre Baran axivî û anî ziman ku dema hevjînê wê hate windakirin zextên li ser wan zêde bûn û got: “Wê demê, keça min a mezin du salî û nîv bû, kurê min salek û nîv bû. Keça min a biçûk 4 mehî bû. Piştî ku hevjînê min hat kuştin, kurê min jî mir. Ew nexweş bû û min nikaribû wî bibim nexweşxaneyê. Leşkeran ne tenê ne hevjînê min windakirin û kuştin, her şev bi ser mala me de digirtin. Di serdegirtinekê de, min bi darê zorê xistin binçavan û birin. Zarokên min bi pêşa min girtibûn kaş dibûn. Nedixwestin ku leşker min bibin. Ditirsiyan nedixwestin min berdin. Em qebûl nakin, bila kujerê hevjînê min bê eşkerekirin.”
‘Herî dawiyê li ser traktöre hatine dîtin’
Piştre rêvebera Şaxa ÎHDa Amedê Eylem Kaya metna serpêhatiya windakirina Omer Oner û Nûrî Dayan xwend. Eylem Kaya diyar kir ku hevjîna Omer Oner, Nezîre Baran wiha gotiye: “Li gund, biraziyê min Muharrem, wekî şofêrê traktorê yê gundiyekî dixebitî û carinan hevjînê min Omer jî ew traktorê diajot. Roja bûyerê, heywanên me winda bûbûn û hevjînê min bi traktorê derket ku li wan bigere. Xizmê me û gundiyê me Nuri Dayan jî, bi hevjînê min Omer re li traktorê siwar bû û pê re çû. Gundiyên derdorê gotin ku wan herî dawî hevjînê min Omer û hevalê wî Nûrî li nêzî gundên ku Bismilê û Stewrê de li ser traktorê dîtine.
Her dem gef li hevjînê min hate xwarin
Hevjînê min û hevalê wî Nûrî Dayan di navbera van her du gundan de winda bûn. Beriya vê bûyerê, leşkerên qereqola polîsan a Çinarê bi berdewamî êrişî mala me dikirin. Fermandarê qereqola polîsan a Çinarê bi eşkereyî gef li hevjînê min xwar. Piştî vê bûyerê, zext zêdetir bûn. Wan em birin Qereqola Polîsan a Çinarê û zext li me kirin û gotin, ‘Hevjînê te çûye çiyê û ew pir caran tê malê’. Min jî ji wan re got, ‘We hevjînê min winda kiriye; her kes vê dizane, û bi serde jî hûn dibêjin ku ew çûye çiyê’. Nêzîkî 6-7 meh piştî bûyerê, gundiyên gundê Tavuklu ya girêdayî Amedê, traktorek terikandî dîtin. Traktor bi guleyan tijî bûbû û motora wê hatibû derxistin.”
Piştî xwendina metna çîroka windakirinê Xizmên Windayan deqîqeyek çalakiya rûniştinê pêk anîn.
