Amed- Ji pirtûkên helbestan heta romanên ku dîroka gelê Kurd vedibêjin, ji lêkolînên li ser zimanê Kurdî heta çîrokên zarokan bi sedan pirtûkên Kurdî li benda xwînerên xwe ne.
Li Amedê 9’emîn Pêşengeha Pirtûkan a ku ji aliyê TUYAP, YEWKURD (Yekîtîya Weşangerên Kurd) û Yekîtiya Weşangerên Tirkiyê ve tê organîzekirin didome. Pêşengeh ji 400ê zêdetir weşanger û saziyên civakî û bi sedan nivîskaran li benda xwînerên xwe ye.
Weşanxaneyên wekî Aram, Aryen, Payîz, Nûbîhar, Wardoz, Awesta, Lîs, Pirtûka Kurdî, Pal, Na, Peywend, Bêjing bi tevahî 32 weşanxaneyên Kurdî bi pirtûkên xwe yên nûjen û klasik li benda xwînerên xwe ne. Li ser dezgehên weşenxaneyên Kurd bi sedan pirtûkên bi Kurdî, bi awayekî xurt, li hemberî zordarî û qedexekan rawestiyane. Ji pirtûkê helbestan heta romanên ku dîroka gelê Kurd vedibêje, ji lêkolînên li ser zimanê Kurdî heta çîrokên zarokan her cure pirtûk hene.
Pêşengeh, ne tenê cihê kirîn û firotina pirtûkan e; her wiha xwînerên ciwan li vir bi weşanger û nivîskarên Kurd re diaxivin, pêşniyazên xwe parve dikin. Nûnerên Weşanxaneyên Kurd ji ajansa me re axivîn. Weşangerên Kurd pêşengeha pirtûkan wekî cejna zimanê Kurdî dibînin û hevîya wan ew e ku her zarokeke/î kurd bi pirtûkekê Kurdî mezin bibe.
