Navenda Nûçeyan – Gelên Rojava vê carê jî di Mihrîcana Muzîkê ya Orkêş a 3yemîn de guh dide muzîk û stranên neteweyan. Di festîvalê de wê komên hemû pêkhateyên Rojava cih bigirin û deng û awazên çanda komînal olan bidin.
Rojava xwe ji bo mihrîcan ango festîvala muzîkê ava dike. Li Rojavayê Kurdistanê, Mihrîcana Muzîkê ya Orkêş a 3yemîn tê lidarxistin. Mihrîcan dê di navbera 8-9-10ê Kanûnê de li bajarê Hesekê bi dirûşma, “Bi çanda komînal deng û awazên gelan vejîn dibe” pêk were.
Bajarên Rojava cihê netew, çand û baweriyan e. Wê bi dehan hunermend û komên muzîkê yên Kurd, Ereb, Ermenî, Suryanî, Asûrî, Keldanî, Tirkmen û Durzî di festîvalê de cih bigirin. Wê di festîvalê de stranên pirzimanî û pirnetewî olan bidin. Amadekariyên mihrîcanê ber bi dawiyê ve diçin û bajarê Hesekê dê mazûvaniya gelek komên muzîkê bike.
Hevserokê Tevgera Çandê ya Kantona Cizîrê û Endamê Komîta Amadekar a Festîvala Orkêş Selman Îbrahîm derheqê lidarxistina festîvalê de axivî.
23 kom beşdar dibin
Selman Îbrahîm bi bîr xist ku ev festîvala sêyemîn e li dar dixin û di festîvalê de armancên hunerî û siyasî hene. Selman Îbrahîm diyar kir ku fêkiyên talî yên muzîkê xwe di festîvala muzîkê de nîşan didin. Selman Îbrahîm anî ziman ku ev sê meh in xebatên amadekariya festîvalê dihatin kirin û got: “Komîteya amadekar li hemû bajaran geriya û bi hunermend û komên muzîkê re gotûbêj kir. Wê 23 komên muzîkê tev li bibin. Vê carê avantaja vê mihrîcanê jî ew e ku komên ciwan tev li dibin. Gelek komên xwedîtecrûbe jî tev li dibin. Komên pêkhateyên Ereb jî tev li dibin. Roja vekirinê bi komên ji derve tên dê dest pê bike.”
Îsal xelatkirin tune ye
Selman Îbrahîm da zanîn ku hemû pêkhate û saziyên li bajarê Hesekê ji bo wan bûne alîkar û ew li bendê ne ku hejmarek zêde kes tev li festîvalê bibin. Selman Îbrahîm diyar kir ku wê gelek stranên folklorik û stranên nû jî di festîvalê de bên gotin û got ku di du salên ewil ên festîvalê de jûrî hebûn û sê kom dihatin xelatkirin lê îsal jûriyê-xelatkirinê rakirin e.
‘Em dixwazin bersiva alozî û fitneya hikûmetê bidin’
Selman Îbrahîm got ku armanca wan pêşxistina hunerê muzîkê ye û dixwazin rê li ber gengeşiyên li ser cihêkariya di navbera gelan de bidawî bikin. Îbrahîm Selman anî ziman ku ew dixwazin ku bi beşdariya komên hemû netewan bersiva Hikûmeta Demkî ya Şamê ku dixwaze aloziyê di navbera gelan de derbixe bidin û ew dixwazin li ser dikê ruhê yekîtiya neteweyan bidin nîşandan. Selman Îbrahîm destnîşan kir ku ew dixwazin komên muzîkê ji bo pêşketina hunerî di asta herî jor de stranan biafirînin, berhemdar bin û muzîkê ji bo şoreşê û civakê çêkin. Selman Îbrahîm diyar kir ku armanca wan ew e ku hevbeşî û mozaîkiya netewan bidin nîşandan.
