SOZ-DERê têkildarî Rojava li navçeya Dêrikê daxuyanî da diyar kir ku êrîşên li dijî destkeftiyên Şoreşa Rojava êrîşên rasterast ên li ser hebûn, rûmet û mafên rewa yên neteweya Kurd e û destnîşan kir ku parastina destkeftiyên Rojava, parastina hêviya hemû parçeyên Kurdistanê ye.
Komeleya Lêkolînên Çand, Dîrok û Wêjeya Devkî (SOZ-DER) ji bo piştgiriya Rojava û parastina destkeftiyên Kurdan ên li Rojava li avahiya xwe ya li navçeya Dêrikê ya Mêrdînê daxuyanî da çapemeniyê. Endamên komeleyê tev li daxuyaniyê bûn.
Di daxuyaniyê de SOZ-DERê bal kişand ser geşedanên dawî yên li Rojavayê Kurdistanê û wiha got: “Rewşa heyî ya li Rojava ne tenê qeyraneke herêmî ye, rûbirûbûneke dîrokî ya ‘hebûn û tunebûnê’ ya gelê Kurd e. Êrîşên li dijî destkeftiyên Şoreşa Rojava weke êrîşên rasterast ên li ser hebûn, rûmet û mafên rewa yên neteweya Kurd binav dikin.”
‘Heta ku Kurd nebin yek dê li Rojhilata Navîn bê parastin bimînin’
SOZ-DERê destnîşan kir ku parastina Rojava, parastina Amedê, Hewlêrê û Mehabadê ye û wiha domand: “Parastina destkeftiyên Rojava, parastina hêviya hemû parçeyên Kurdistanê ye. Heta ku Kurd weke netewek nebin yek deng, yek helwest û yek rêxistin, ew ê di nav bahozên siyasî yên Rojhilata Navîn de bêparastin û di bin metirsiyê de bimînin.”
SOZ-DERê diyar kir ku jinên Kurd di Şoreşa Rojava de bûne sembola azadî û rûmetê, dîrokê ji nû ve diafirînin, sînoran dişkînin û pêşerojeke azad ji bo hemû gelê Kurd ava dikin. SOZ-DERê destnîşan kir ku ruhê yekîtiyê yê li her çar aliyên Kurdistanê derket holê bê parastin û bê meşandin.
‘Bêdengî şirîkatiya zilm û êrişan e’
Komeleyê bang li cîhanê kir û got: “Bêdengî şirîkatiya zilm û êrîşan e.” SOZ-DERê di berdewamiya daxuyaniya xwe de bang li saziyên navneteweyî, rêxistinên mafên mirovan, ronakbîr, nivîskar û hemû kesên azadîxwaz kir ku li dijî êrîşên qirker bêdeng nemînin û helwesta xwe ya zelal nîşan bidin.
‘Bi helwesta xwe yekîtiya Kurdan xurt bike’
SOZ-DERê di dawiya daxuyaniya xwe de wiha got: “Bi raman û çandê sînoran rake, bi ruhê şoreşa jinan azadiyê bîne ziman, bi helwest û xebatên xwe yekîtiya dil û hişê Kurdan xurt bike. Yek e, Yek e, Yek e! Kurdistan Yek e!’, Rojava Rojhilat e, Kurdistan yek welat e!”
