Amed – Montajkerê belgefîlma “Kardeş Turkulerê” Erhan Ors diyar kir ku festîvalên wisa hêz dide sînemageran û got: “Dewlet bi hinceta nasnameya Kurdî ji me re astengiyan derdixe. Lê sînemaya Kurdî dikare astengiyên li ser nasnameya Kurdî bide nîşandan.”
Di navbera 7 û 14ê Kanûnê de Festîvala Fîlman a Amedê ya 3yemîn bi mazûvaniya Şaredariya Bajarê Mezin a Amedê û bi organîzetoriya Komeleya Akademiya Sînemayê ya Rojhilata Navîn û Sinebîrê tê lidarxistin. Festîval bi coş bênavber didome. Bi dehan derhênerên bi fîlmên cûr bi cûr tev li festîvalê dibin. Di festîvalê de li ser fîlman gelek nîqaşên girîng tên kirin. Montajkerê belgefîlmê “Bi Kardeş Turkuler re 30 sal” Erhan Ors jî tev li festîvalê bû. Erhan Ors di sala 2022yan de ji bo karên wî yê sînemayê hatibû girtin û 7 meh girtî mabû. Erhan Ors têkildarî girîngiya Festîvala Fîlman a Amedê û astengiyên li ser sînemaya kurdî axivî.
‘Di festîvalê de nêzî 45 film bi kurdî ne’
Erhan Ors diyar kir ku piştî 8 salan Festîvala Fîlman a Amedê tê lidarxistin ji bona wî pîroz e û ev tişt anî ziman: “Ev festîval ji bo gel û sînemageran pêk tê. Wekî tê zanîn li bajarên Kurdan polîtîkayên qeyûman hebûn. Bi sedema ve gelek festîval û çalakiyên çandê hatin qûtkirin. Di sala 2012an de cara yekemîn herî dawî jî di sala 2016an de ev festîval hatibû lidarxistin. Îro jî festîval cara 3yemîn tê lidarxistin. Em gelek bi kelecan in. 84 fîlm dê bên pêşkeşkerin. Nêzî 45 film jî bi Kurdî ne. Sînema di nava wan 8 salan de berdewam kir. Derhêner fîlmên xwe çêdikirin. Lê kişandin gelek zehmet bû, me ji bo festîvalan cih nedidît. Festîval nedihatin lidarxistin. Ji bona wê me fîlmên xwe festîvalên li Ewropa û Tirkiyeyê nîşan dida. Lê ew ne festîvalên me bûn. Ji bo fîlmên kurdî kota hebûn.”
‘Ev festîval sînemaya Kurdî xurt dike’
Erhan Ors anî ziman ku festîval hêz dide derhêner û sînemageran û wiha axivî: “Dema ku derhênerêk xebatên wisa dibîne dibêje ‘ez dikarim vî karî pêk bînim.’ Ji xwe ev kar ji bo nîşandanê tê çêkirin. Dema ku fîlmekê ku neyê nîşandan tu wateya wî fîlmî jî namîne. Fîlm ji bo temaşekeran tê çêkirin. Sînema ne tenê ji bo belavkirina berhemê ye. Di festîvalê de li ser sînemaya kurdî nîqaş tên kirin ev jî bandorek baş dide derhêneran. Divê xebatên wisa berdewam bikin. Divê li tevahiya Kurdistanê xebatên wisa bên çêkirin. Ev festîval sînemaya Kurdî xurt dike.”
‘Sinemaya Kurdî dikarê astengiyên li ser nasnameya Kurdî bide nîşandan’
Erhan Ors destnîşan kir ku mirov Kurd be ji gelek aliyan ve tê astengkirin û axaftina xwe wiha bi dawî kir: “Ji bo em Kurd in dewlet asteng dike. Lê ev astengî ne tenê ji bo sînemageran pêk tê, her kes van astengiyan dijî. Ev astengî girêdayî nasnamaya me ye. Li ser nasnameya Kurdî zordarî tê kirin. Lê sînemaya Kurdî dikarê astengiyên li ser nasnameya Kurdî bide nîşandan. Sînemagerên Kurd dikarin van tiştan pêk bînin.”
