Serokê Parlamentoya Îranê Muhammed Bakir Galîbaf gihişt Bexdayê û ji aliyê Cîgirê Yekem ê Serokê Parlamentoya Iraqê ve hat pêşwazîkirin.
Medyaya Iraqê derbarê gihîştina serokê Parlamentoya Îranê Muhammed Bakir Galîbaf a ji bo Iraqê û hevdîtinên wî yên li gel berpirsên Iraqê, agahî parve kirin.
Li gorî medyaya Iraqê Bakir Galîbaf beriya niha demek kurt gihiştiye Bexdayê û ji aliyê Cîgirê Yekem ê Serokê Parlamentoya Iraqê Ednan Feyhan ve hatiye pêşwazîkirin.
Li gorî heman çavkaniyan wê Galîbaf ewil bi serokê parlamentoya Iraqê re bicive. Piştre jî bi serokên fraksiyonên di nav parlamentoya Iraqê de bicive.
Tê gotin piştî hevdîtinên li parlamentoyê, wê Galîbaf bi serokwezîr, serokkomar û serkirdeyên din ên siyasî yên Iraqê re hevdîtinan bike.
Li gorî medyaya Îranê mijarên sereke yên guftûgoyan; xurtkirina peywendiyên dualî, ewlehiya sînoran, rûbirûbûna “terorê”, geşepêdana hevkariyên aborî û şopandina bicihanîna peymanên hevpar ên di navbera her du welatan de ne.
