Bi pêşengiya MEBYA-DERê serdana şîna gerîlaya PKKê Delîla Amed (Zîndan Remîz) hate kirin û
di şînê de gotin: “Divê em xeyalên wan ên di nîvco de mane pêk bînin.”
Gerîlaya PKKê Delîla Amed (Zîndan Remîz) ku di 30yê Îlana 2024an de li Çiyayê Metîna di encama şer
de jiyana xwe ji dest dabû, li gundê Elwendiyê yê navçeya Çinarê ya Amedê malbata wê konê
sersaxiyê danî. Bi pêşengiya Komeleya Piştevanî û Alîkariyê ya bi Malbatên Xizmên Xwe li Dergûşa
Şaristaniyê Winda Kirine re (MEBYA-DER), Rêveberên MEBYA-DERê, hevserokên DEM Partiyê, hevşaredarên navçeyan, rêveberên DBPê, aktîvîstên Tevgera Jinên Azad (TJA), TUAY-DER, endamên Komeleya 78an, Komeleya Dayîkên Aştiyê û gelek kes tevli şînê bûn. Girseya ku çûn şînê dua xwendin û ji bo kesên di têkoşîna azadiyê de jiyana xwe dest dane rêz girtin. Piştî rêzgirtinê dirûşmeya “Şehîd namirin” hate berzkirin.
‘Em ê xewn û xeyalên wan li erdê nehêlin’
Endama MEBYA-DERê Guler Sevîktek di serdanê de axivî û got: “Ez dibêm bila ev şehîd Delîla bibe şehîda dawî ya Kurdistanê, lê mixabin ne ya dawî ye. Van şehîdan ji ber ku zilm û zoriyê qebûl nekirin canê xwe dan. Rabûn xwe kirin feda. Em ê jî xewn û xeyalên wan li erdê nehêlin û bibin şopdarên tola wan.”
‘Bi tenê dayîk zane çi ji ber dilê xwe winda kiriye’
Endama MEBYA-DERê Meyrem Soylu jî wiha axivî: “Bi saya serê şehîdên xwe em tên ba hev û em hevûdin nas dikin. Divê em hevdu ji bîr nekin. Ji ber ku şehîdên me canê xwe yê ciwan û xwîna xwe ya teze ji bo vî gelî feda kirine, divê em cihê wan li ser serê xwe bigirin. Hêz, xewn û xeyalên wan pir mezin bûn. Tenê bi keleşa xwe li dijî tang, top û teyaran şer dikin. Ji ber ku îradeya wan pir mezin bû, tu carî serî nedanîn. Ew çar gurçuk in, kesên ku ne çar gurçuk bin nikarin ew qas li ber xwe bibin û şer bikin. Divê em xeyalên wan ên di nîvco de mane pêk bînin. Di berf û baranê de doşeka wan herî û kevir bûn û lihêfa wan jî esman bû. Bi tenê dayîk zane çi ji ber dilê xwe winda kiriye.”
