Amed – Endama Rêveberiya Herêmî ya DEM Partiyê Rojda Nazlier, derbarê Konferansa Rêveberiyên Herêmî ya Demokratîk de diyar kir ku armanca konferansê nirxandina xebatên du salên dawî û amadekirina nexşerêya 3 salên bê ye û wiha got: “Em ê bi beşdarbûna gel şaredariyên demokratîk û civakî ava bikin.”
Lijneya Rêveberiya Herêmî ya Partiya Wekheviyê û Demokrasê ya Gelan (DEM Partiyê) li Wan, Mûş, Sêrt, Mêrdîn, Riha, Amed û Stenbolê konferansên Rêveberiyên Herêmî li dar xistin. DEM Partî dê konferansa Rêveberiyên Herêmî ya navendî jî di navbera 6 û 9ê Hezîranê de li Amedê li dar bixe. Konferansa ku dê 4 rojan berdewam bike dê sibê li Eywana Alî Emîrî ya Şaredariya Bajarê Mezin a Amedê dest pê bike. Di 6 û 7ê Hezîranê de dê bi dirûşma “Bi Îradeya Jinan Komunan Ava Dikin, Bi Rêveberiyên Herêmî Civakek Azad Ava Dikin” Konferansa Jinan a Rêveberiyên Herêmî ya Demokratîk bê lidarxistin. Hevserokên DEM Partiyê, TJA, Meclîsa DEM Partiyê, hevşaredar û endamên meclisên şaredariyan ku wekî delege hatine hilbijartin dê beşdarî konferansê bibin.
Endama Lijneya Jinan a Rêveriyên Herêmî ya Navendî ya DEM Partiyê Rojda Nazlier têkildarî konferansê ji ajansa me re axivî.
‘Xebatên du salan dê werin nirxandin’
Rojda Nazlier di destpêka axaftina xwe de bi bîr xist ku beriya konferansa navendî, li 7 bajaran konferansên xwecihî hatin lidarxistin. Rojda Nazlier destnîşan kir ku di van konferansan de xebatên ku di du salên dawî de bi şaredariyan re hatine meşandin, hatine nirxandin, rexne û pêşnîyar hatine parvekirin û wiha got: “Di 6 û 7ê Hezîranê de em ê konferansa xwe ya navendî li Amedê li dar bixin. Di vê konferansê de em ê xebatên du salan binirxînin. Piştî konferansê jî em ê plansazî û nexşeyarêya 3 salan amade bikin.”
‘Xebatên jinan bê navber berdewam dikin’
Nazlier bal kişand ser siyaseta qeyûman a ku di 10 salên dawî de li Kurdistanê hatiye meşandin û destnîşan kir ku di dema qeyûman de kar û xebatên jinan hatine astengkirin û xespkirin.
Endama Lijneya Jinan a Rêveriyên Heremî a Navendî ya DEM Partiyê Rojda Nazlier bi lêv kir ku piştî şaredarî careke din bi dest xistine, xebatên jinan jî ji nû ve dest pê kirin û wiha pê de çû: “Em dizanin ku xebatên me hîn têrê nakin lê asta ku em îro gihiştine girîng e. Tevî zor û zehmetiyan em xebatên jinan didomînin. Di nav sazî û navendên jinan de gelekî çalakî tên meşandin û xebatên me bênavber berdewam dikin.”
‘Îktîdar jinan wek metirsî dibîne’
Di axaftina xwe de Rojda Nazlier anî ziman ku desthilat li dijî xebatên jinan rawestiyaye û wiha domand: “Desthilat naxwaze ji bo jinan xebat bên kirin. Jinan wekî metirsiyekê dibîne û dixwaze astengiyan biafirîne. Lê tevî van şert û mercan jî em xebatên xwe didomînin.”
‘Di 4 rojan de plansaziya demeke nû dê were çêkirin’
Nazlier derheqê bernameya konferansê de jî ev tişt vegot: “Bernameya ku dê 4 rojan berdewam bike, du roj tenê dê bi beşdariya jinan berdewam bike û du rojên paşîn jî dê bi awayekî giştî were domandin. Di konferansê de xebatên ku heta niha hatine kirin dê bên nirxandin, kêmasî bên tesbîtkirin û plansazîya demeke nû were çêkirin.”
‘Em ê biryarên xwe bi gel re bidin’
Her wiha Rojda Nazlier bal kişand ser peyama bingehîn a konferansê û wiha dawî li axaftina xwe anî: “Peyama me ew e ku di karên şaredariyê û rêveberiya xwecihî de gel beşdar bibe. Em dixwazin bi gel re biryarên xwe bidin û kar û xebatên xwe bi gel re bi rê ve bibin. Armanca me xurtkirina şaredariya gel û şaredariya civakî ye. Em dixwazin bi beşdarbûna gel şaredariyên demokratîk û civakî ava bikin.”
