Rêveberiya Xweser a Kobanê ragihand ku dorpêça li ser bajarê Kobanê hêj didome û hikûmeta demkî ya Şamê şertên Peymana 29ê Çileyê hîn bicih neaniye.
Rêveberiya Xweser a Kobanê, têkildarî dorpêça li ser bajar didome daxuyaniyeke nivîskî weşand. Di daxuyaniyê de hate destnîşan kirin ku hikûmeta demkî ya Sûriyeyê pêwîstiyên Peymana 29ê Çileyê li Kobanê û derdora wê pêk naîne.
‘Dorpêça li ser Kobanê didome’
Li gor daxuyaniyê, her çend zêdetirî 50 roj derbas bûne, şert û mercên dorpêçkirinê li ser Kobanê hîn jî didomin û wiha hate gotin: “Internet qut bûye, çûn û hatin tê astengkirin û derbasbûna sotemeniyê jî tê rawestandin. Hêzên girêdayî hikûmeta veguhêz li hin gundên başûrê rojhilatê Kobanê sivîlan direvînin û mafên welatiyan binpê dikin.”
Banga bicihanîna peymanê
Rêveberiya Kobanê xwest ku Hikûmeta Şamê bêyî derengmayîn şertên peymanê pêk bîne û ev xal hatin rêzkirin: “Divê dorpêç demildest bi tevahî rabe. Li hemberî taybetmendiya îdarî û çandî ya herêmê û nêzikbûna bi gelê herêmê re rêz bê girtin û pêwistiyên Peymana 29ê Çileyê demildest bê bi cih anîn.”
‘Gavên Şamê li dijî şertên Peymanê ne’
Di daxuyaniyê de hate gotin ku tayînkirina berpirsên ji derveyî herêmê ji aliyê hikûmeta Şamê ve li dijî şertên peymanê û îradeya gelê herêmê ye. Rêveberiyê tekez kir ku gelê Kurd di Sûriyeyê de bi hezaran şehîd û qurbaniyên mezin dane da ku maf û îradeya xwe biparêze.
‘Dubarekirina rejîma berê dê pirsgirêkan çareser neke’
Rêveberiya Kobanê hişyar kir ku dubarekirina rêbaz û siyasetên rejîma berê dê pirsgirêkan çareser neke. Di daxuyaniyê de hate ragihandin ku avakirina Sûriyeya nû tenê bi beşdariya hemû pêkhateyên welêt dikare pêk were. Rêveberiyê di dawiyê de bang li dewletên garantor kir ku berpirsyariyên xwe bicih bînin û zextê li hikûmeta Şamê bikin da ku şertên peymanê demildest pêk bîne.
