Profesorê Îtalyayî Enzo Traverso, ji bo piştgiriya banga Aştî û Civaka Demokratîk a Rêberê Gelê Kurd Abdullah Ocalan peyamek ji DEM Partiyê re şand û got: “Pirsgirêka neteweyî ya Kurd di qonaxeke dîrokî de ye.”
Profesorê Îtalyayî Enzo Traverso, ji bo Banga Aştî û Civaka Demokratîk a Rêberê Gelê Kurd Abdullah Ocalan peyameke piştgiriyê ji Partiya Wekhevî û Demokrasiyê ya Gelan (DEM Partî) re şand. Traverso diyar kir ku pirsgirêka Kurd di qonaxeke dîrokî de ye û werekiya kesên ku ev gav avêtine divê bê teqdîrkirin.
Enzo Traverso di peyama xwe de ev yek anîn ziman: “Pirsgirêka neteweyî ya Kurd di qonaxeke dîrokî de ye. Biryara PKKê ya devjêberdana têkoşîna çekdarî û xwe fesihkirinê, veguherîna siyaseta demokratik û bi rêya aştiyanî ji bo veguherîna Sosyalizme dixebitê, bêguman ew biryareke pir zahmet bû. Li gorî min, divê çepgirên cîhanê vê guherîna stratejîk bi erênî qebûl bikin û werekiya kesên ku ev biryar girtine teqdîr bikin. Niha pêvajoyeke siyasî ya nû dest pê kir. Ev pêvajo dibe ku bi nezelalî, zehmetî û astengiyên nediyar tijî be. Lê belê ji bo pêşveçûnê her tim werekî û biryardarî pêwîst e.”
Kurtejiyana Enzo Traverso
Enzo Traverso, di sala 1957an de li Îtalyayê ji dayik bûye, piştî ku ji Zanîngeha Cenovayê mezûn bû, di sala 1989an de ji Êcole des Hautes Études en Sciences Sociales (EHESS) doktoraya xwe wergirt. Bi salan li Fransayê li gelek zanîngehan dersên zanistên siyasî da. Ji sala 2013an û vir ve li Beşa Dîrokê ya Zanîngeha Cornellê wekî profesor dixebitê. Traverso, bi xebatên xwe yên li ser dîroka rewşenbîrî û siyasî ya Ewropaya sedsala 20an tê naskirin. Ev pirtûk nivîsîn; “Marksîst û Pirsgirêka Cihûyan, Agir û Xwîn: Şerê Navxweyî yê Ewropayê, Dîrok wekî Qada Şer: Şîrovekirina Zorakariyên Sedsala 20an, Dawiya Modernîteya Cihûyan: Dîroka Qonaxeke Muhafezekar, Rexneya Hovitiya Modern, Dîrokeke Rewşenbîrî, Melankoliya Çepê: Marksîzm, Dîrok û Bîr, Bikaranîna Rabirdûyê: Dîrok û Bîr, Polîtîka û Çavkaniyên Tundiya Naziyan.”
