Pêşangeha Seramîkê ya DFGê ya ji bo bîranîna nûçegihanê Ozgur Gundemê Huseyin Deniz ku roja Şemiyê hatibû vekirin, piştî 3 rojan bi dawî bû.
Ji bo bîranîna nivîskar û nûçegihanê rojnameya Ozgur Gundemê Huseyin Deniz ku di 9ê Tebaxa 1992yan de li navçeya Serêkaniyê ya Rihayê di êrişeke çekdarî ya JÎTEMê de hate kuştin, roja Şemiyê pêşangeha seramîkê hatibû vekirin. Pêşangeha seramîkê ya piştî 3 rojan bi dawî bû. Ev pêşengeh bi pêşengiya malbata Huseyîn Denîz û Nûnertiya Komeleya Rojnamegeran a Dîcle Firatê (DFG) ya Wanê de bi dirûşmeya “Em bîra xwe diparêzin”hatibû vekirin û di roja 3yemîn de gelek kesan serdana pêşengehê kirin. Pêşangeha ku di Galeriya Hunerê ya Şaredariya Rêya Armûşê de hat vekirin, bisiklêtek, rojnameyên belavbûyî û querenfîlên ku Kadrî Bağdu temsîl dikin, hebûn. Di pêşangehê de rojname, wêneyên endamên Ozgur Gundemê yên ku hatine kuştin, wênekêş, daktîlo û cîhaza deng girtinê yên Huseyîn Denîz jî hatin nîşandan. Di roja dawî de Hevserokên Partiya Herêmên Demokratîk (DBP), Hevserokê DEM Partiya Wanê, Hevşaredarên Rêya Armûşê Canan Ûzûnay û Tahîr Şapkaci, nûnerên saziyên sivîl û gelek kesan serdana pêşangehê kirin.
‘Ew ji bo me nirxên herî gihanbûha ne’
Di pêşangehê de li ser navê DFGê rojnameger Bazîd Evren axivî û di şexsê Huseyîn Denîz de hemû şehîdên Çapemeniya Azad bi bîr anî. Bazîd Evren anî ziman ku ew xwedî li mîrateya Huseyîn Denîz derdikevin û got: “33 sal beriya niha hêzên tarî ji bo astengkirina ragihandina heqîqetê Huseyîn Denîz kuştin. Lê niha bi sedan rojnameger ji bo ragihandina heqîqetê li qadê ne û li ser şopa Huseyîn Denîz û Apê Mûsa nûçeyan çêdikin. Kuştina rojnamegeran dide nîşan ku ragihandina heqîqetê ji bo gelê Kurd çiqas girîng e. Ew ji bo me nirxên herî giranbûha ne û em ê jî heta dawiyê xwedî li van nirxan derbikevin.”
Piştre keça Huseyîn Denîz, Zozan Denîz jî axivî û bixêrhatina mêvanan kir û da zanîn ku ew ê heta dawiyê li ser şopa bavê xwe û rêhevalên wî be.
‘Em em deyndarê cangoriyên xwe ne’
Herî dawî Hevseroka DBPa Wanê Gonul Ûzûnayê axivî û şehîdên Çapemeniya Azad bi bîr anî û bal kişand ser zextên li ser Çapemeniya Azad. Gonul Ûzûnayê da zanîn ku ragihandina heqîqetê li her derê gelek zehmet e û diyar kir ku ev zihmetî herî zêde li erdnîgariya Kurdistanê derdikeve holê. Gonul Ûzûnayê anî ziman ku Kurd ji bo ax û warên xwe li ber xwe didin û got: “Taybetî di vê berxwedanê de jî Çapemeniya Azad ji bo ragihandina heqîqetê kedeke mezin daye. Yek ji van kesên kedeke mezin dayî, şehîd Huseyîn Denîz e. Berdêlên vê têkoşînê çi dibe bila bibe, dîsa jî Çapemeniya Azad dest ji şopandina heqîqetê bernedaye. Niha jî Çapemeniya Azad hem li cîhanê hem jî li Rojhilata Navîn dengê heqîqetê ne. Em jî siyaseta xwe ya demokratîk bi saya wan ji raya giştî re parve dikin û em deyndarê wan in.”
Piştî serdana girseyî ya îro pêşangeh piştî 3 rojan bi dawî bû.
